Yanga – Greensports Site: Habari za michezo na burudani Tanzania na Ulimwenguni.

Vipigo vyazua mihemko Yanga

Green Sports — Tue, 12 Nov 2024 18:26:01 +0000

Na Hassan Kingu
Yanga hadi sasa hawajaamini kama wamefungwa bao 1-0 na Azam FC, hawajaamini na hawataki kukubali kwamba mbali na Azam pia wamefungwa mabao 3-1 na Tabora United
Kilichowakuta wanaona kama si hadhi yao, wao si wa kufungwa na sasa wameanza kusaka mchawi kwa staili ya mihemko, wakati huo huo mahasimu wao Simba wakiendelea kuwananga kwa kila namna.
Mmoja wa wahanga ambaye amekuwa mjadala katika mihemko hiyo ni kocha Miguel Gamondi ambaye jina lake la Master Gamondi limeanza kuonekana si lolote mbele ya baadhi ya mashabiki wa Yanga.
Wapo mashabiki ambao wanaamini vipigo hivyo viwili vinatosha kuwa sababu ya timu hiyo kuachana na Gamondi na kusaka kocha mwingine.
Katika hilo tayari kocha kutoka nchini Algeria ameanza kutajwa na hata picha zake kutawanywa kwenye mitandao ya kijamii na vyanzo mbalimbali vya habari.
Ni baada ya vipigo hivyo ndipo tumeanza kusikia habari kwamba Gamondi haambiliki, ni baada ya vipigo hivyo tumeanza kusikia kuwa uwezo wa kocha huyo ni mdogo, vipigo pia vimemfanya aanze kulinganishwa na kutofautishwa na mtangulizi wake Nasreddine Nabi.
Gamondi ambaye jana aliimbwa na kupambwa kwa kila namna leo hali imekuwa tofauti, mechi mbili zimempa sura tofauti kabisa na sura aliyokuwa nayo jana.
Utajiri au uwezo wa kifedha wa Yanga nao unazidi kuzidisha mtazamo mbaya kuhusu Gamondi kwamba ana wachezaji wazuri na hivyo timu yake inapaswa kuishinda kila timu inayocheza nayo.
Hoja kuhusu matatizo yanayowakabili wachezaji wa kikosi cha kwanza wa timu hiyo ni kama vile zinaonekana si lolote si chochote badala yake tatizo ni uwezo wa kocha kuwatumia wachezaji waliopo kwa kuwa nao uwezo wao ni wa juu.
Kuumia kwa mabeki tegemeo wa timu hiyo, Shadrack Boka anayecheza upande wa kushoto na Yao Kouasi anayecheza upande wa kulia kumeiathiri Yanga lakini wako mashabiki ambao wanaamini hiyo haitoshi kuwa sababu ya timu yao kufungwa.
Kupewa kadi nyekundu na kukosekana kwa beki mwingine tegemeo wa kati, Ibra Bacca nako pia hakutoshi kuwafanya baadhi ya mashabiki kuamini kwamba hilo ni tatizo linaloifanya timu yao isipate matokeo mazuri.
Mashabiki hawa kwao tatizo la kupoteza mechi mbili ni la kiufundi na mhanga kwao ni Gamondi, anatakiwa aondoke na nafasi yake apewe kocha mwingine.
Ukiachana na Gamondi, mhanga mwingine ambaye ameanza kulalamikiwa ni wachezaji, hawa wanadaiwa kuanza kushuka viwango au kutocheza katika ubora wao.
Mhanga mmojawapo mkuu katika hilo ni Stephane Aziz Ki ambaye ukame wake wa mabao msimu huu umeanza kulalamikiwa hasa baada ya vipigo hivyo viwili.
Mengi ya Aziz Ki yameanza kuzungumzwa, wapo ambao wamekuwa akirusha mitandaoni picha za mchezaji huyo katika maisha yake binafsi akiwa maeneo ya starehe na kuzihusisha moja kwa moja na kushuka kwake kiwango.
Wengine wanakwenda mbali zaidi na kutaja jina la mtu ambaye wanaamini ndiye anayemkwaza mchezaji huyo asifunge au akose penalti au ubora wake ushuke (kama kweli umeshuka).
Kuna ambao ukiwasikiliza utadhani ni mashuhuda wa mchezaji huyo katika maisha yake ya kila siku ya nje ya uwanja, wanajua anaishi wapi na anafanya nini na anafanya na nani. Hoja za kiufundi zinazotolewa kwamba baadhi ya mabeki wameshamjulia Aziz Ki zinaonekana kutokubalika, badala yake mchezaji huyo anatakiwa afunge asipofanya hivyo sababu ya haraka inayotolewa ni kwamba ameshuka kiwango.
Ukweli ni kwamba taharuki iliyoibuka sasa ikipewa nafasi wakati huu ligi bado mbichi inaweza kuivuruga Yanga kuliko ilivyo sasa.
Hoja zote zinazotolewa na mashabiki kama hazitafanyiwa tathmini ya uhakika zinaweza kuwa mtaji mzuri wa mahasimu wa Yanga kuivuruga timu zaidi ya hiki kinachoonekana kwa sasa.
Upo uwezekano mkubwa kwamba hoja za kumsakama Gamondi na wachezaji wa Yanga zinatoka upande wa pili na kutumiwa ili kuitoa Yanga kwenye mstari na kibaya zaidi ni kwamba Yanga wenyewe wameingia katika mtego wa taarifa zisizo rasmi na kuziamini.
Taarifa hizo zisizo rasmi ni kama vile kikao kizito kimefanyika na maamuzi yamefanyika, Gamondi hana muda mrefu wa kuinoa Yanga.
Habari hizi za upande mmoja kutumia udhaifu wa upande wa pili kama jiwe ni utamaduni wa muda mrefu baina ya timu hizi.
Kilichopo ni kwamba Yanga hii ni timu nzuri, na japo vipigo vinashtua lakini uongozi usikubali taharuki na mihemko iliyoibuka iwe sababu ya kuivuruga timu yao.
Inaweza kuonekana jambo la kawaida na rahisi kumuondoa Gamondi na kuja na kocha mpya lakini huyo kocha mpya ajaye kazi yake inaweza kuwa ngumu na kumfanya ahitaji muda mrefu wa kupata timu ya ushindi.

Azam yaipiga Yanga 1-0

Green Sports — Sat, 02 Nov 2024 19:55:45 +0000

Na mwandishi wetu
Yanga leo Jumamosi Novemba 2, 2024 imepoteza kwa mara ya kwanza mechi ya Ligi Kuu NBC msimu wa 2024-25 baada ya kulala kwa bao 1-0 mbele ya Azam FC.
Bao hilo pekee katika mechi hiyo iliyochezwa kwenye dimba la Azam Complex, Chamazi, Dar es Salaam, lilifungwa na Gibril Sillah dakika ya 33 akiitumia vizuri pasi ya Adolf Mtasingwa.
Dalili za ushindi kwa Azam zilianza kuonekana dakika ya nane ya mchezo baada ya Paschal Msindo kuitoka safu ya ulinzi ya Yanga na wakati akimkaribia kipa Djigui Diarra aliangushwa chini na Mudathir Yahya.

Tukio hilo liliibua malalamiko kwa wachezaji wa Azam ambao walikuwa wakimlalamikia mwamuzi Ahmed Arajiga kwa imani kwamba alipaswa kuwapa penalti.
Kasi ya Azam iliwaweka Yanga pabaya dakika 10 kabla ya kuingia kwa bao hilo pekee baada ya beki wao wa kati tegemeo, Ibra Bacca kulazimika kumvuta shati Nassor Saaduni aliyemtoka kwa kasi akielekea kukutana na kipa Diarra.
Kwa tukio hilo, Bacca alipewa kadi nyekundu hapo hapo hali ambayo ilizidi kuibua hofu kuhusu hatma ya Yanga kwenye mechi hiyo baada ya kubaki na wachezaji 10 uwanjani.
Yanga nayo mara kadhaa ililichachafya lango la Azam, dakika ya 17, Maxi Nzengeli alimpa Clatous Chama pasi ndefu ambayo aliituliza vizuri na mpira kumsogezea Stephane Aziz Ki ambaye hata hivyo shuti lake halikuwa na madhara.
Dakika ya 88, Yanga ilifanya shambulizi jingine kali kwa mpira ulioanzia kwa Clement Mzize ambaye baada ya kuwazidi ujanja mabeki wa Azam akapiga krosi iliyomkuta Nickson Kibabage ambaye hata hivyo shuti alilopiga lilitoka nje.
Azam baada ya kuwa mbele walianza ujanja wa kuchelewesha muda hali ambayo ilimlazimu mwamuzi wa mchezo huo kumpa kadi ya njano kipa wa timu hiyo, Mohamed Mustapha.
Katika kusaka bao la kusawazisha, kocha wa Yanga Miguel Gamondi alimtoa Chama akaingia Duke Abuya na baadaye akamuingiza Kibabage na kumtoa Shedrack Boka na Prince Dube akatoka nafasi yake akaingia Clement Mzize.
Kocha huyo aliendelea kufanya mabadiliko kwa kumtoa Aziz Ki na nafasi yake kuingia Pacome Zouzoua na Mudathir nafasi yake akaingia Kennedy Musonda mabadiliko ambayo hayakubadili matokeo ya mchezo.
Kwa upande wa Azam walitoka Sillah na Msindo na kuingia Frank Tiesse na Sidibe na baadaye wakatoka Fei Toto na Yeison Fuentes na kuingia Ever Mezer na Yanick Bangala.
Yanga pamoja na kipigo hicho bado inaongoza ligi ikiwa na pointi 24 sawa na Singida BS ambayo nayo leo hii inaumana na Coastal Union japo matokeo ya mechi hiyo yanaweza kuitoa Yanga kileleni.

Yanga yashika usukani ligi kuu

Green Sports — Wed, 30 Oct 2024 20:34:13 +0000

Na mwandishi wetu
Yanga imefanikiwa kuushika usukani wa Ligi Kuu NBC msimu huu kwa mara ya kwanza baada ya kuichapa Singida BS bao 1-0 katika mechi iliyochezwa leo Jumatano kwenye Uwanja wa New Amaan, Zanzibar.
Kwa ushindi huo Yanga ambao ni mabingwa watetezi wa ligi hiyo wamefikisha pointi 24 na kuwazidi Singida BS kwa pointi mbili ingawa Singida imecheza mechi tisa wakati Yanga hadi sasa imecheza mechi nane.
Bao hilo pekee la Pacome lilipatikana katika dakika ya 67 baada ya mchezaji huyo kufumua shuti kali la mguu wa kushoto lililompita kipa wa Singida BS, Metacha Mnata.
Metacha ambaye aliwahi kuichezea Yanga, licha ya kufungwa bao hilo lakini mara kadhaa alikuwa mwiba kwa safu ya ushambulizi ya Yanga na haikushangaza Yanga kupata bao hilo pekee licha ya mashambulizi kadhaa waliyoyafanya.
Yanga ilipata pigo la mapema baada ya beki wake wa kushoto mwenye uwezo mkubwa wa kupanda kupeleka mashambulizi, Shedrack Boka kuumia dakika ya saba na baadaye kutolewa dakika ya 17 na nafasi yake kuingia Nickson Kibabage.
Kibabage hakuwangusha Yanga, dakika ya 31, aliambaa vyema na mpira akitokea upande wa kushoto wa timu yake na kumpa pasi ya chinichini Aziz Ki ambaye shuti lake liligonga mwamba kabla ya kuokolewa na Metacha.
Singida BS walijibu shambulizi hilo dakika 10 baadaye kwa kufanya shambulizi lililotokana na mpira wa kurushwa ambao D Camara aliuunganisha kwa kichwa na Elvis Rupia naye akapiga tena kwa kichwa na mpira kutoka sentimita chache juu ya lango la Yanga.
Yanga walifanya shambulizi tena dakika ya 61, Clatous Chama alimpasia mpira Aziz Ki ambaye alipiga shuti la juu na Metacha kuonesha umahiri wake kwa kuufuata mpira huo juu na kuutoa kona ambayo haikuzaa matunda.
Mambo yaliendelea kuwaharibikia Yanga ambao walilazimika kumtoa Kibabage na nafasi yake kuingia Ibrahim Bacca baada ya Kibabage kuumia.

Yanga yaibutua Coastal 1-0

Abdul Mohammed — Sat, 26 Oct 2024 16:01:55 +0000

Na mwandishi
Yanga imepanda hadi nafasi ya pili kwenye Ligi Kuu NBC baada ya kuichapa Coastal Union ya Tanga bao 1-0 mechi iliyochezwa leo Jumamosi kwenye Uwanja wa Sheikh Amri Abeid, Arusha.
Bao hilo pekee la Yanga lilipatikana dakika ya 24 mfungaji akiwa ni Jean Baleke ambaye hilo ni bao lake la kwanza katika ligi kuu msimu huu tangu ajiunge na timu hiyo.
Baleke alifunga bao hilo kutokana na mpira wa kona iliyochongwa na Maxi Nzengeli na kuokolewa vibaya na Haroub Mohamed kabla ya kumkuta Khalid Aucho aliyemsogezea Baleke na kuujaza wavuni.
Coastal licha ya kufungwa bao hilo walilichachafya mara kadhaa lango la Yanga ambalo katika mechi ya leo lililindwa vyema na kipa namba mbili Aboubakar Khomeini.
Kwa upande wa Coastal kipa wao Chuma Mgeni naye hakuwa nyuma katika kudhibiti mashambulizi ya mara kwa mara ya Yanga na haikushangaza hadi dakika 90 zinamalizika Yanga walipata bao moja tu.
Coastal nusura wasawazishe bao baada ya Ernest Malongo kuunganisha kwa kichwa mpira wa adhabu dakika chache kabla ya kutimia dakika 90 lakini wakati akiupiga mpira huo alikuwa tayari ameotea.
Kwa ushindi huo Yanga imefikisha pointi 21 katika mechi saba ikiwa haijapoteza hata mechi moja na kutua nafasi ya pili iliyokuwa ikishikiliwa na mahasimu wao, Simba huku Singida BS wakiendelea kushikilia usukani.
Baada ya kuona mambo hayaendi kama ilivyotarajiwa, kocha wa Yanga, Miguel Gamondi alifanya mabadiliko kadhaa akiwatoa Baleke, Maxi Nzengeli na Aziz Ki na nafasi zao kuingia Pacome Zouzoua, Clatous Chama na Prince Dube.
Mabadiliko hayo bado hayakubadili matokeo hata pale alipomtoa Yao Kouasi aliyeumia na nafasi yake kuingia Duke Abuya na Clement Mzize ambaye nafasi yake aliingia Aziz Andambwile lakini matokeo yalibaki 1-0.
Katika mechi nyingine ya ligi hiyo, KMC ikiwa ugenini iliilaza Tanzania Prisons mabao 2-1, mabao ya washindi yakifungwa na Daruwesh Saiboko dakika za 16 na 60 wakati bao la Prisons lilifungwa na Oscar Mwajanga dakika ya 74.

Simba, Yanga zatamba ligi kuu

Green Sports — Wed, 23 Oct 2024 05:48:59 +0000

Na mwandishi wetu
Vigogo vya soka Tanzania, timu za Simba na Yanga zimefanya vizuri katika mechi zake za Ligi Kuu NBC Jumanne hii, Simba ikiichapa Prisons bao 1-0 na Yanga ikiilaza JKT Tanzania kwa mabao 2-0.
Simba ikiwa ugenini kwenye Uwanja wa Sokoine mjini Mbeya ilifaidika na bao hilo pekee mfungaji akiwa ni beki Che Malone Fondoh katika dakika ya tano ya mchezo huo.
Ushindi wa Simba umekuja ikiwa ni siku takriban tatu zimepita tangu icheze na mahasimu wao Yanga na kulala kwa bao 1-0 kwenye Uwanja wa Benjamin Mkapa Dar es Salaam.
Yanga ambao ni mabingwa watetezi wa ligi kuu waliendeleza dhamira yao ya kulitetea taji hilo wakiwa kwenye dimba la Azam Complex kwa ushindi wa mabao ya Pacome Zouzoua dakika ya 23 na Clatous Chama dakika ya 44.
Kwa uushindi huo Yanga sasa imefikisha pointi 18 katika mechi sita ikiwa haijapoteza hata mechi moja na inashika nafasi ya pili nyuma ya Singida BS wanaoshika usukani wakiwa na pointi 19 baada ya kucheza mechi saba.
Kwa upande wa Simba ushindi huo umeifanya timu hiyo kufikisha pointi 16 baada ya kucheza mechi saba ikiwa imepoteza mechi moja dhidi ya Yanga na kutoka sare mechi moja dhidi ya Coastal Union na inashika nafasi ya tatu.

Marufuku kuuza jezi zenye nembo ya Yanga

Green Sports — Fri, 18 Oct 2024 06:44:31 +0000

Na mwandishi wetu
Uongozi wa klabu ya Yanga umetangaza kuwa ni kinyume cha sheria kwa mtu yeyote au taasisi kutengeneza, kuagiza au kusambaza bidhaa zozote zenye nembo ya Yanga bila ruhusa.
Taarifa ya klabu hiyo kutoka idara ya sheria iliyopatikana Alhamisi hii, pia imefafanua kuwa ni kinyume cha sheria kwa wafanyabiashara wa jumla na rejareja kuuza bidhaa zozote zenye nembo ya klabu hiyo.
Kwa mujibu wa taarifa hiyo, bidhaa hizo ili ziweze kuuzwa na wafanyabiashara hao ni lazima ziwe zimesambazwa na mshirika rasmi wa klabu hiyo ambaye ni kampuni ya GSM.
Agizo la klabu hiyo limekuja ikiwa takriban mwaka mmoja umepita tangu polisi jijini Dar es Salaam wakamate kontena mbili zenye jezi zinazodaiwa kuwa na nembo ya Yanga, Simba, Azam FC na Taifa Stars.
Sambamba na katazo la kuuza na kusambaza bidhaa zenye nembo ya klabu hiyo, taarifa ya Yanga pia imepiga marufuku kwa taasisi yoyote kutumia nembo ya Yanga kwenye matangazo yake ya aina yoyote bila ridhaa ya klabu hiyo.
Yanga wameeleza kuwa vitendo hivyo ni ukiukwaji wa hakimiliki za klabu na hatua kali za kisheria zitachukuliwa dhidi ya yeyote atakayehusika.
Katika kuhakikisha suala hilo linafanyiwa kazi na wananchi wote, klabu hiyo imeahidi kutoa zawadi nono kwa yeyote atakayetoa taarifa za kuwabaini wanaojihusisha na shughuli hizo ambazo klabu hiyo umezitaja kuwa ni haramu.

Yanga yaitandika Pamba 4-0

Green Sports — Fri, 04 Oct 2024 07:20:15 +0000

Na mwandishi wetu
Yanga imeendeleza ubabe katika Ligi Kuu NBC baada ya kuichapa Pamba Jiji mabao 4-0 katika mechi iliyopigwa Alhamisi hii jioni kwenye Uwanja wa Azam Complex, Chamazi, Dar es Salaam.
Kwa mara nyingine nyota ya beki wa timu hiyo, Ibrahim Hamas ‘Bacca’ imeendelea kung’ara baada ya kuandika bao la kwanza katika dakika ya tano ya mchezo huo.
Bacca pia ndiye aliyefunga bao pekee la ushindi la timu hiyo katika mechi nyingine ya ligi hiyo dhidi ya Ken Gold, mechi ambayo Yanga ilitoka na ushindi wa bao 1-0.
Stephane Aziz Ki aliihakikishia Yanga kwenda mapumziko ikiwa mbele kwa mabao mawili baada ya kuandika bao la la pili katika dakika ya 45.
Mambo yaliendelea kuwaharibikia Pamba ambao walijikuta wakibugizwa bao la tatu zikiwa zimepita takriban dakika 10 baada ya timu kutoka mapumziko mfungaji akiwa ni Maxi Nzengeli.
Zikiwa zimebakia dakika tano mpira kumalizika, Kennedy Musonda alikamilisha karamu ya mabao ya Yanga baada ya kufunga bao la nne na kuihakikishia Yanga pointi tatu muhimu.
Mambo yaliwaharibikia zaidi Pamba ambao walilazimika kucheza pungufu kwa kipindi chote cha pili baada ya mchezaji wake Saleh Abdullah kupewa kadi nyekundu kwa kumchezea rafu Shedrack Boka wa Yanga.
Kwa ushindi huo Yanga ambao ni mabingwa watetezi wa ligi hiyo sasa wamefikisha pointi 12 katika mechi nne wakiwa hawajapoteza hata mechi moja.
Katika mechi nyingine ya ligi hiyo, Azam FC ikiwa ugenini ilitoka na ushindi wa bao 1-0 mbele ya Namungo wakati KMC nayo ikiwa nyumbani iliichapa Kagera Sugar bao 1-0.

Yanga, Simba ushindi mwembamba

Green Sports — Mon, 30 Sep 2024 06:48:38 +0000

Na mwandishi wetu
Yanga na Simba zimetoka na ushindi mwembamba wa bao 1-0 kila moja katika mechi zao za Jumapili hii za Ligi Kuu NBC wakati Azam FC ikiambulia sare ya bila kufungana.
Simba iliyokuwa kwenye Uwanja wa Jamhuri mjini Dodoma ilipata ushindi wa bao hilo pekee lililofungwa katika dakika ya 63 na Jean Ahoua kwa mkwaju wa penalti.
Penalti hiyo ilitolewa baada ya Mohamed Hussein ‘Zimbwe Jr’ kuchezewa rafu na kiungo wa Dodoma Jiji Salmin Hoza na mwamuzi Omar Mdoe kuamuru ipigwe penalti japo wachezaji wa Dodoma Jiji walipinga uamuzi huo.
Ushindi huo licha ya kuwa mwembamba lakini ni wa nne mfululizo kwa Simba na unaifanya timu hiyo ifikishe pointi 12 ikiwa haijapoteza hata mechi moja tangu kuanza kwa ligi hiyo msimu huu wa 2024-25.
Nao mahasimu wao Yanga kama ilivyo kwa Simba walineemeka na bao pekee la Maxi Nzengeli mbele ya KMC katika mechi iliyopigwa kwenye Uwanja wa Azam Complex jijini Dar es Salaam.
Ushindi huo umeifanya Yanga kufikisha pointi tisa katika michezo mitatu na kama ilivyo kwa mahasimu wao Simba, Yanga nao hawajapoteza mchezo hata mmoja tangu kuanza kwa ligi.
Nao Azam walijikuta pagumu baada ya kubanwa na Mashujaa na kutoka sare ya bila kufungana katika mechi iliyopigwa kwenye Uwanja wa Lake Tanganyika mjini Kigoma.
Azam ambayo imetoka kutolewa kwenye michuano ya Ligi ya Mabingwa Afrika, hiyo sasa inakuwa sare yake ya tatu tangu kuanza kwa ligi hiyo.
Katika mechi nyingine ya ligi hiyo, Singida Black Stars imeshindwa kutamba kwenye uwanja wake wa nyumbani wa CCM Liti baada ya kulazimishwa sare ya bao 1-1 na JKT Tanzania.

Yanga yabeba pointi 3 kwa Ken Gold

Green Sports — Wed, 25 Sep 2024 16:51:35 +0000

Na mwandishi wetu
Timu ya Yanga imefanikiwa kutoka uwanjani na pointi tatu mbele ya Ken Gold FC baada ya kuichapa bao 1-0 kaika mechi ya Ligi Kuu NBC iliyopigwa leo Jumatano kwenye Uwanja wa Sokoine mjini Mbeya.
Bao pekee lililoitoa Yanga kimasomaso katika mechi hiyo lilifungwa dakika ya 17 na beki wa kati Ibrahim Bacca ambaye aliunganisha kwa kichwa mpira wa adhabu uliopigwa na Stephane Aziz Ki.
Ken Gold ambayo haijashinda hata mechi moja tangu kuanza kwa ligi msimu huu, ilionekana kuwa kisiki dhidi ya Yanga kwa kuwafanya washambuliaji nyota wa timu hiyo kushindwa kupata mabao.
Matarajio ya Yanga kuongeza mabao baada ya bao la Bacca yalifutwa na ukuta mgumu wa Ken Gold ukiongozwa na mlinda mlango Castro Mhagama ambaye alikuwa kikwazo mbele ya Yanga.
Dakika ya 41, Clement Mzize aliinasa pasi ya Maxi Nzengeli na kuambaa na mpira kabla ya kufumua shuti la chinichini ambalo Mhagama aliliokoa.
Mhagama kwa mara nyingine dakika ya 59 aliokoa shuti la Nzengeli lililotokana na pasi ya Shadrack Boka na kuwa kona iliyopigwa na Clatous Chama na mpira kuokolewa.
Dakika ya 84 tena Mhagama alikuwa kikwazo kwa Yanga akiokoa mpira uliopigwa na Pacome Zouzoua ambao ulikuwa ukielekea golini lakini akaupoza kabla ya kukolewa na beki wake.
Katika dakika ya 86, Ken Gold walifanya shambulizi ambalo nusura lizae bao baada ya Albert Lukindo akiwa karibu na kipa Djigui Diarra kuupiga mpira wa kichwa uliompita Diarra lakini haukuvuka mstari wa goli, tukio lililozua utata kwa Ken Gold kulalamika wakiamini kuwa mpira ulivuka mstari kabla ya kurudi dimba.
Dakika ya 82 mwamuzi alilazimika kumpa kadi ya njano beki wa Ken Gold, Mackenzie Ramadhan baada ya mchezaji huyo kuingia katika mzozo na Boka tatizo likianzia kwa wachezaji hao kugongana wakiwania mpira wa juu.
Baada ya mpira huo Boka alimfuata Mackenzie na kumlaumu kabla ya kumsukuma na Mackenzie akajibu ndipo Kennedy Musonda alipoingilia na kumuondoa Mackenzie.
Ushindi mdogo wa Yanga umeonekana kuwashangaza wengi kwani licha ya mabadiliko yaliyofanywa na kocha Miguel Gamondi bado timu hiyo ilikwama kuupenya ukuta wa Ken Gold.
Gamondi alianza kwa kuwatoa Mzize na Chama na kuwaingiza Prince Dube na Pacome, baadaye akawatoa Nzengeli na Aziz Ki na kuingia Mudathir Yahya na Musonda na mwisho akamtoa Yao Kouasi na kumuingiza Aziz Andambwile.
Kwa upande wa Ken Gold, kocha Jumanne Chale aliwatoa Mashimo Daud na Albert Lukindo na kuwaingiza Hemed Nassor na Emmanuel Mpuka.
Katika mechi nyingine ya ligi hiyo iliyochezwa leo mambo yamekuwa mabaya kwa Coastal Union ambayo imelala kwa mabao 2-1 mbele ya Namungo.

Yanga yaibugiza CBE 6-0

Green Sports — Sun, 22 Sep 2024 06:56:01 +0000

Na mwandishi wetu
Yanga imeendeleza ubabe katika michuano ya Ligi ya Mabingwa Afrika baada ya kuibugiza Commercial Bank of Ethiopia (CBE) mabao 6-0 na kufuzu moja kwa moja hadi hatua ya makundi.
Kwa ushindi huo uliopatikana Jumamosi hii Septemba 21 usiku kwenye Uwanja wa New Amaan, Zanzibar, Yanga pia imelamba kitita cha Sh milioni 30 ikiwa ni ahadi ya Rais Samia Suluhu Hassan.
Rais Samia ameahidi kutoa Sh milioni tano kwa kila bao linalofungwa kwenye michuano hiyo iwapo timu itatoka na ushindi katika mechi husika.
Baada ya kufanya mashambulizi Yanga ilianza kuzitikisa nyavu za CBE dakika ya 35 kwa bao la Clatous Chama ambaye aliinasa pasi ya Maxi Nzengeli, akamlamba chenga kipa Alemayo na kuujaza mpira wavuni.
Bao hilo halikuubadili mchezo kwa kiasi kikubwa kwani licha ya Yanga kufanya mashambulizi ya hapa na pale lakini CBE walikuwa makini kujihami na hadi mapumziko Yanga walitoka uwanjani na bao hilo pekee.
Moto wa Yanga ulianza kuonekana kipindi cha pili baada Clement Mzize kuambaa na mpira kabla ya kumchambua kipa wa CBE na kuujaza mpira wavuni.
Baada ya hapo Yanga ilifanya mabadiliko, kocha Miguel Gamondi aliwatoa Pacome Zouzoua, Maxi Nzengeli, Mzize na Chama na kuwaingiza Stephane Aziz Ki, Duke Abuya, Prince Dube na Kennedy Musonda.
Mabadiliko hayo yalizidi kuipa nguvu Yanga ambayo ilipata bao la tatu dakika ya 74 lililofungwa na Aziz Ki akiitumia krosi ya Shedrack Boka ambayo kwanza mpira uliokolewa kabla ya kumkuta mfungaji aliyeujaza wavuni.
Baada ya bao hilo Gamondi alimtoa Yao Kouasi na nafasi yake kuingia Dennis Nkane na hapo hapo Yanga ikapata bao la nne lililofungwa na Mudathir Yahya dakika ya 87.
Mudathir ambaye kama kawaida Yanga hushangilia kwa staili ya kupokea simu, alifunga bao hilo baada ya kuinasa pasi ya juu ya Dube, akautuliza mpira kifuani kabla ya kufumua shuti lililojaa wavuni.
Dakika ya 90 Yanga iliandika bao la tano lililofungwa na Abuya kutokana na pasi ya Aziz Ki, dakika ya pili kwenye dakika tatu za nyongeza Yanga iliandika bao la sita lililofungwa na Aziz Ki kwa pasi ya Boka.
Kwa matokeo hayo Yanga inakuwa imefuzu hadi hatua ya makundi ya michuano hiyo kwa ushindi wa jumla wa mabao 7-0 hiyo ni baada ya ushindi wa awali wa bao 1-0 walioupata wiki iliyopita wakiwa ugenini Ethiopia.