Algers, Algeria
Yanga imeshindwa kuweka rekodi ya kuwa timu ya kwanza Tanzania kubeba Kombe la Shirikisho Afrika licha ya kuilaza USM Algers bao 1-0 katika mechi ya fainali ya Kombe la Shirikisho Afrika.
Vinara hao wa Ligi Kuu NBC wakiwa ugenini Algeria Jumamosi hii walipambana kishujaa na kupata bao hilo pekee la mkwaju wa penalti lililofungwa na Djuma Shaban katika dakika ya saba baada ya Kennedy Musonda kuchezewa rafu.
Wenyeji USMA walineemeka na bao la ugenini baada ya kupata ushindi wa mabao 2-1 katika mechi ya kwanza iliyopigwa kwenye Uwanja wa Mkapa, Dar es Salaam na hivyo matokeo ya jumla kuwa 2-2.
Katika mechi hiyo kocha wa Yanga, Nasreddine Nabi alianza kwa mfumo wa 3-4-3, ambao ulionekana kuwa na faida kwa timu yake hadi kupata bao hilo pekee.
Yanga pia iliweza kufanya mashambulizi ya maana kwenye lango la USMA katika dakika zote 90 lakini zaidi kwenye kipindi cha pili baada ya mabadiliko ya wachezaji aliyokuwa akiyafanya Nabi na kama kungekuwa na umakini historia mpya ingeandikwa Tanzania.
Kipa Djigui Diarra kwa mara nyingine ameendelea kudhidhirisha umahiri wake baada ya kuokoa mkwaju wa penalti iliyotolewa katika dakika ya 59 mpigaji akiwa nahodha wa USMA, Balaid Zenadine. Penalti hiyo ilitolewa baada ya Ibrahim Bacca kumchezea rafu Tumisang Orebonye.
Kwa matokeo hayo Yanga inaishia kulamba kitita cha Sh bilioni 2.3 wakati vinara USMA wao watapata Sh bilioni 4.7 ambazo anapewa bingwa wa michuano hiyo.
Matokeo hayo pia yanawapa wachezaji wa timu hiyo medali lakini pia timu hiyo ina kila sababu ya kujivunia kwa kutoa mfungaji bora wa michuano hiyo ambaye ni Fiston Mayele aliyefunga mabao saba.
Kama ambavyo Yanga walikuwa wakipigania kubeba taji la kwanza la michuano hiyo, USMA nao walikuwa na azma hiyo hiyo ambayo wameifanikisha wakati kwa Yanga imeshindikana na hivyo Juni 3, 2023 inabaki kuwa kumbukumbu kwa Yanga kufikia hatua ya fainali ya michuano hiyo.
Nje ya hayo Yanga inakuwa imepoteza fursa ya kubeba mataji matatu katika msimu mmoja na sasa inabakiwa na fursa ya kubeba mataji mawili kama itafunga Azam katika mechi ya fainali ya Kombe la FA itakayopigwa Juni 12 kwenye Uwanja wa Mkwakwani, Tanga.
USMA: Benbot, Radouani, Loucif, Alilet, Belaid, Chita, Bousseliou/Belkacemi, Merbah/Meziane, Mahious/Benkhelifa, Merili na Orebonye.
Yanga: Diarra, Djuma Shaban/Moloko, Lomalisa/Farid Mussa, Bacca, Bakari Mwamnyeto, Dickson Job, Tuisila Kisinda/Ben Morrison, Aboubakar Salum, Mayele, Mudathir Yahya/Clement Mzize na Musonda/Aziz Ki.

Na Hassan Kingu
Yanga kesho Jumamosi itashuka dimbani kwenye fainali ya mkondo wa pili ya Kombe la Shirikisho Afrika dhidi ya USM Alger. Fainali ya kwanza, Yanga ikiwa nyumbani ililala kwa mabao 2-1.
Kesho Yanga itakuwa na kibarua kingine Uwanja wa Julai 5, 1962 mjini Algiers ikitaka kujiuliza juu ya matokeo ya awali lakini pia kuhakikisha haipotezi ubingwa wa Shirikisho uliobakiza dakika 90 pekee kumtambua bingwa mpya.
Mpira unadunda, hauna mwenyewe, haupaswi kukosewa heshima; hizi ni kauli za kibabe za soka katika kujipa matumaini ya kupindua meza, kauli ambazo bila shaka Yanga inatembea nazo.
Lakini baada ya kauli hizo tukirejea kwenye hali halisi, Yanga ina kazi ya kufanya kupindua meza ugenini na kutawazwa mabingwa wapya na kuweka rekodi mpya kabisa Ukanda wa Cecafa (Baraza la Mashirikisho ya Soka Afrika Mashariki na Kati).
Yanga ikifanya hivyo itakuwa timu ya kwanza Cecafa kupindua meza ugenini katika fainali hizo na kunyakua ubingwa. Kombe hili halijawahi kwenda Cecafa na Cosafa (Baraza la Vyama vya Soka Kusini mwa Afrika) pekee.
Wanajangwani hao wamekuwa wakipindua meza na kuruka viunzi kadhaa tangu kuanza kwa michuano hii msimu huu. Nachelea kusema Yanga wanayaweza haya mapambano bila ya kushusha hadhi ya mchezo ulio mbele yao.
Yanga ilianza kuweka alama zake ikitinga hatua ya makundi baada ya kuibonda Club Africain ya Tunisia kwa bao 1-0 ugenini baada ya mechi iliyopigwa kwa Mkapa kuisha kwa suluhu.
Haikuishia hapo, kwenye mechi sita za hatua ya makundi, Yanga imepoteza moja ugenini dhidi ya US Monastir kabla ya ushindi wa mechi nne na sare moja bila ya kupoteza uwanja wa nyumbani.
Ilipofika robo fainali iliibugiza Rivers United ya Nigeria iliyokuwa kwao mabao 2-0 kabla ya suluhu Yanga ilipokuwa nyumbani na hivyo kupenya nusu fainali kwa ushindi wa ugenini.

Nusu fainali ilipokutana na Marumo Gallants ya Afrika Kusini, waliichapa mabao 2-0 kwa Mkapa kabla ya kuichapa tena mabao 2-1 kwao na kuvunja mwiko wa timu hiyo kutofungwa nyumbani katika kombe hilo msimu huu.
Kwa mantiki hiyo, mpaka Yanga inafika fainali imekuwa ikinufaika na mechi za ugenini lakini je, kesho itafanikiwa kutembea na mwendo huo mbele ya kocha Abdelhak Benchikha aliyeipa RS Berkane ndoo ya Super Cup msimu huu kwa kuifunga Wydad CA mabao 2-0? Ni suala la kusubiri.
Hata hivyo, USMA inaitolea macho fainali hii ikitaka kuchukua ubingwa huo kwa mara ya kwanza ikiwa ndio mara ya kwanza pia kuingia fainali ya michuano hiyo, kama vile ambavyo Yanga imeingia kwa mara ya kwanza.
USMA imepania kuweka rekodi ya kuchukua ndoo hiyo kwani hii ni mara ya pili inacheza fainali ya michuano ya klabu Afrika, awali iliingia fainali ya Ligi ya Mabingwa Afrika mwaka 2015 na kupoteza kwa jumla ya mabao 4-1 mbele ya TP Mazembe, Mbwana Samatta akifunga mabao mawili.
Na Waalgeria hao wanaamini hii ni nafasi kwao kwa kuwa wamebakiza mechi moja nyumbani na hawajapoteza mchezo wowote kwao msimu huu katika michuano hiyo.
Kwanza ilitinga hatua ya makundi kwa ushindi wa nyumbani wa bao 1-0 dhidi ya Cape Town City baada ya suluhu ya mechi ya nyumbani.
Kwenye makundi, USMA ilishinda mechi tatu nyumbani, sare mbili na kufungwa mechi moja ugenini na Gallants. Kwenye robo fainali ikaipasua AS FAR kwa mabao 2-0 nyumbani kabla ya kukubali kichapo cha mabao 3-2 ugenini.
Nusu fainali ikaikazia Asec Mimosas na kutoka suluhu ugenini na walipokwenda Algeria ikaibomoa Asec mabao 2-0.
Kwa kifupi, USMA haijafungwa kwake kama ilivyokuwa Yanga msimu huu mpaka pale ilipoharibiwa rekodi hiyo na USMA wenyewe Mei 28, mwaka huu na sasa utagundua Yanga haichezi mechi ya leo kwa kuwania kombe pekee bali kutibua pia rekodi ya wababe hao wa Kaskazini ya kutofungwa kwao.
Yanga hata hivyo itaingia kwenye mchezo huo ikiwa na rekodi ya kuwa na mfungaji bora wa michuano hiyo tangu kuanzishwa kwake.
Fiston Mayele amefunga mabao saba mpaka sasa akiwa amefunga kwenye kila hatua ambapo mabao matatu amefunga hatua ya makundi, mawili robo fainali, moja nusu fainali na jingine kwenye mchezo wa kwanza wa fainali.
Ranga Chivaviro wa Gallants mwenye mabao sita, Paul Acquah (Rivers), Aubin Kouame (Asec) wenye mabao manne kila mmoja, timu zao zimetoka na nafasi ya kupambana na Mayele angalau inaonekana kwa Khaled Bousseliou wa USMA mwenye manne pia.
Ingawa lolote linaweza kutokea na kuandikwa rekodi mpya ya mfungaji bora wa Shirikisho aliyefunga ‘hat-trick’ kwenye fainali ya mwisho lakini hilo halizuii ukweli kuwa ni jambo gumu kulishuhudia.
Yote kwa yote, mechi ya kesho ni mechi ya rekodi kuanzia kwa Yanga kupindua meza na kushinda ugenini fainali, kutoa mfungaji bora na kuwa timu ya kwanza Cecafa kufanya hivyo.
Kwa USMA pia nayo inatazamia kuyafanya hayo kwa upande wao na kuchukua kombe la kwanza la klabu baani Afrika.

Na mwandishi wetu
Serikali ya Tanzania imeeleza kukamilisha mipango yote kwa ajili ya safari ya Yanga kuelekea Algeria kwenye mechi ya fainali ya mkondo wa pili wa Kombe la Shirikisho Afrika dhidi ya USM Alger.
Mchezo huo wa pili unatarajia kuchezwa Juni 3, mwaka huu Uwanja wa Julai 5, 1962 mjini Algiers baada ya USMA kuibuka na ushindi wa mabao 2-1 kwenye Uwanja wa Mkapa, Dar es Salaam juzi Jumapili.
Msemaji Mkuu wa Serikali, Gerson Msigwa alisema kama ahadi ilivyotolewa na Rais Samia Suluhu Hassan, ametekeleza kwa kutoa ndege yenye uwezo wa kubeba abiria 262 kuipeleka timu hiyo keshokutwa Alhamisi na kurejea Julai 4, mwaka huu baada ya mechi hiyo.
“Kama ilivyotangazwa, Rais ametoa ndege ambayo ina uwezo wa kubeba abiria 262 kwa ujumla wake lakini pengine mwongozo utatolewa hapo baadaye, lakini maelekezo ya Rais Samia anahitaji ibebe wachezaji, viongozi na mashabiki wa kwenda kushangilia,” alisema Msigwa.
Alisema matokeo ya mechi ya kwanza hayakuwa mazuri lakini Serikali imetekeleza wajibu wake kuhakikisha wanaondoa uchovu kwa safari ambapo ndege hiyo itaruka moja kwa moja mpaka Algiers ikitumia masaa matano mpaka sita.
Alisema serikali inaamini kupitia Yanga kwamba inaweza kuuleta ubingwa huo nchini msimu huu, ndiyo maana inashirikiana nayo kuhakikisha wanatimiza ndoto yao hiyo.
Alipotafutwa Ofisa Habari wa Yanga, Ali Kamwe kufahamu kuhusiana na mipango ya safari ya timu hiyo kuelekea mchezo huo unaosubiriwa kwa hamu, simu yake ya mkononi iliita bila kupokelewa.
Wakati huo huo, Wizara ya Utamaduni, Sanaa na Michezo imetoa pole kwa familia iliyopoteza mpendwa wao, William Ernest aliyefariki katika mchezo wa kwanza wa fainali hiyo kwenye Uwanja wa Mkapa. Wizara pia ilitoa pole kwa majeruhi wengine wa katika tukio hilo.

Na mwandishi wetu
Yanga leo Jumapili imeanza vibaya mechi ya kwanza ya fainali ya Kombe la Shirikisho Afrika baada ya kufungwa mabao 2-1 na USM Alger mechi iliyopigwa kwenye Uwanja wa Mkapa, Dar es Salaam.
Wageni USMA waliandika bao la kwanza katika dakika ya 32 lililofungwa na Aiman Mahious ambaye aliwazidi ujanja mabeki wa Yanga na kuunganisha kwa kichwa mpira wa adhabu uliopigwa na Brahima.
Adhabu hiyo ilitolewa baada ya Dickson Job kumchezea rafu Brahima ambaye kwa umakini alipiga mpira wa juu ambao Mahious aliutumia kuipatia USMA bao lililodumu kipindi chote cha kwanza.
Dakika ya 84, mashabiki wa Yanga wakiwa wamekata tamaa, Fiston Mayele aliwainua vitini na kuamsha upya matumaini ya mashabiki hao alipoifungia timu yake bao la kusawazisha.
Mayele alifunga bao hilo kwa mpira ulioanzia kwa Benard Morisson aliyeingia badala ya Tuisila Kisinda, Morrison aliudokoa mpira wa juu na kumkuta Mudathir aliyemuunganishia Mayele pasi ya kichwa na Mayele akautuliza kabla ya kufumua shuti lililokwenda wavuni.
Kwa Mayele hilo linakuwa bao lake la saba kwenye michuano hiyo na hivyo kuendeleza dhamira yake ya kutaka kuwa mfungaji bora wa michuano hiyo huku akiwa ndiye kinara wa mabao kwenye Ligi Kuu NBC na mabao yake 16.
Furaha ya mashabiki wa Yanga hata hivyo ilidumu dakika mbili tu baada ya USMA kuongeza bao la pili lililofungwa na Meril ambaye akiwa karibu na lango la Yanga aliunganishiwa pasi na kwa utulivu akaujaza mpira wavuni kwa shuti lililoonekana kumpoteza maboya kipa wa Yanga, Djigui Diarra.
Yanga pamoja na kipigo hicho lakini ilionyesha uhai tangu mwanzoni wa mchezo, mfano dakika ya 22, Mayele aliambaa na mpira kulia mwa lango la USMA na kufumua shuti la chinichini ambalo lilimpita kipa wa USMA, Benbot lakini baada ya kumpita kipa huyo wachezaji wa Yanga walishindwa kumalizia kwa kuujaza wavuni.

Dakika ya 49 tena kona fupi ya Aziz Ki ilimkuta Kisinda ambaye aliunganisha mpira vizuri katika lango la USMA lakini mpira huo uliwashinda, Mayele na Mwamnyeto na kutokuwa na madhara yoyote.
Aziz Ki ambaye baadaye alitolewa na nafasi yake kuingia Salum Aboubakar, dakika ya 64 alipiga kiufundi mpira wa adhabu uliotokana na rafu aliyochezewa Mudathir lakini umahiri wa kipa Benbot ulikuwa kikwazo na kuinyima Yanga bao.
Kwa matokeo hayo, Yanga inakuwa imezikosa Sh 20 milioni ambazo Rais Samia Suluhu Hassan aliahidi kuzitoa kwa kila bao la timu hiyo lakini kwa sharti bao hilo liwe limeipa timu ushindi.
Yanga sasa inasubiri kurudiana na USMA ugenini Algeria, mechi itakayopigwa Juni 3 na ikiweza kupindua meza itabeba kombe na kulamba kitita cha Sh 4.7 bilioni, matokeo yakikuwa mabaya timu hiyo italamba Sh 2.3 bilioni. Lolote linawezekana, bado kuna dakika nyingine 90 za kutafuta matokeo.

Na mwandishi wetu
Hatimaye imesalia siku moja kabla ya kupigwa mechi ya fainali ya kwanza ya Kombe la Shirikisho Afrika kati ya Yanga na USM Alger ya Algeria huku makocha wa timu zote wakitamba kutaka ushindi kwenye mechi hiyo.
Akizungumza leo Jumamosi, Kocha Mkuu wa Yanga, Nasreddine Nabi alisema fainali hiyo itakuwa na ufundi mkubwa kutokana na mipango waliyonayo na ya wapinzani wao ambao watahitaji matokeo kama wao katika mechi hiyo.
Nabi aAlisema anawafahamu Waalgeria juu ya jihad ya kujitolea waliyonayo lakini hata Yanga wataingia na nguvu ya tofauti katika mchezo huo wakifahamu wanaipambania bendera ya Tanzania katika fainali hiyo ya kwanza kihistoria ya michuano hiyo.
“Tunacheza na timu kubwa ndio maana wapo fainali, haitakuwa rahisi kama mashabiki pengine wanavyotaka sababu tuko nyumbani tufunge mabao mengi, wachezaji wakiingia kwenye huo mtego, mechi imeharibika.
“Nimefundisha jirani na Algeria, tunafahamiana na sisi Watunisia, wote wana ‘tabia za Italia’ za kujitolea, kujituma wakijua wanataka kupata kitu, hata sisi Yanga tuna ‘tabia yetu ya kujitolea’, kujituma kuangalia kwana bendera ya Tanzania, kwahiyo najua wachezaji wote wako tayario na hilo,” alisema Nabi.
Nabi pia, alieleza kusikitishwa kwa kumkosa kiungo, Khalid Aucho katika mechi hizo mbili za fainali kutokana na kuwa na kadi za njano sita lakini anaamini uwepo wa wachezaji wengine kwenye nafasi yake watafanya vizuri kutokana na uwezo mkubwa walionao.
Kocha Mkuu wa USMA, Abdelhak Benchikha alisema anaamini mechi iko nusu kwa nusu kutokana na ubora wa timu zote ingawa hata kama yuko ugenini hatoruhusu kukaba tu bali watacheza soka kwa kushambulia kama wako kwao Algeria.
“Mimi na vijana wangu tunawaza kujitahidi kuzuia njia za wapinzani, tutahitaji kumiliki mpira na kushambulia, hatutakaa nyuma kama wacheza tenisi, sisi ni timu ya mpira, hatutacheza kama tupo ugenini, tutacheza kama tuko nyumbani, ndiyo maana ya mpira,” alisema Benchikha.
Kocha huyo alieleza kutambua uwepo wa mshambuliaji Fiston Mayele wa Yanga lakini akasema hamuhofii huyo pekee kwani Yanga ina wachezaji wengi hatari na wenye kasi kama Tuisila Kisinda aliyewahi kumfundisha akiwa RS Berkane ya Morocco, hivyo anafahamu mchezo hautakuwa mwepesi.
Baada ya mchezo huo utakaopigwa saa 10 jioni kwenye Uwanja wa Mkapa, timu hizo zitarudiana kwenye fainali ya pili itakayopigwa Juni 3, mwaka huu Uwanja wa Julai 5, 1962 mjini Algiers.
Timu hizo ambazo zote zinacheza fainali ya michuano hiyo kwa mara ya kwanza, zimeingia fainali baada ya Yanga kuibutua Marumo Gallants ya Afrika Kusini kwa jumla ya mabao 4-1 wakati USMA iliichapa Asec Mimosas ya Ivory Coast mabao 2-0.

Na mwandishi wetu
Zikiwa zimesalia siku mbili kabla ya kuchezwa kwa fainali ya Kombe la Shirikisho Afrika kati ya Yanga na USM Alger, uongozi wa Yanga umesema umepokea tiketi 18,213 kutoka kwa wadau mbalimbali kwa ajili ya wanachama na mashabiki wa timu hiyo.
Miongoni mwa wadau waliofanikisha kupatikana kwa tiketi za mchezo huo wa kwanza wa fainali hizo, utakaopigwa Jumapili hii, Uwanja wa Mkapa, Dar es Salaam ni Rais Samia Suluhu Hassan aliyetoa tiketi 5,000.
Wengine ni Mkuu wa Mkoa wa Dar es Salaam, Albert Chalamila, Benki za NBC, NMB, CRDB na wadau wengine waliochangia na tiketi zimewafikia huku akisema baadhi wametangaza lakini hazijawafikia.
Akizungumza jijini jana Alhamisi, Mkurugenzi wa Matawi na Wanachama Yanga, Haji Mfikirwa alisema mwitikio wa wadau kuchangia tiketi umetokana na hamasa ya Rais Samia tangu atangaze hivi karibuni na wengi wamejitokeza.

“Tangu kuanza utaratibu huu, wanachama wetu na mashabiki wamekuwa wakiuliza utaratibu ukoje wa kugawa tiketi na tunashukuru wadau wote kwa kuchangia kwani hii ni mara ya kwanza kupokea tiketi nyingi kiasi hiki,” alisema.

Alitaja utaratibu wa ugawaji tiketi kwa wanachama na mashabiki kuwa utaangalia wale watakaokuja kwenye mechi uwanjani kutoka matawi yote nchini na kuhimiza makampuni na wadau kuendelea kuunga mkono.
Ofisa Habari na Mawasiliano wa Yanga, Ally Kamwe alisema maandalizi ya mchezo huo yanakwenda vizuri na kuhimiza watu kuendelea kununua tiketi kwani bado nafasi zipo nyingi.
Alisema wanatarajia kupokea wageni zaidi ya 200 kutoka Shirikisho la Soka Afrika (Caf) na wengine kutoka sehemu mbalimbali kuushuhudia mchezo huo.
Katika hatua nyingine, alisema Ijumaa hii wanatarajia kufanya tamasha la uhamasishaji Mbagala Zakheim litakalohusisha wasanii wote ambao ni mashabiki wa Yanga, vikundi vya hamasa, waigizaji na wachekeshaji.
Pia, alitangaza kuendesha shindano la Twenzetu Algeria ili kupata wanachama na mashabiki watatu watakaosafiri nao katika mechi ya fainali ya pili itakayochezwa Algeria Juni 3, mwaka huu. Washindi wa shindano hilo wanatarajiwa kutangazwa Jumapili hii.
Pamoja na hilo, Yanga wamekabidhiwa vifaa vya ngoma vilivyonunuliwa na wadau kwa lengo ya kuongeza hamasa kwa makundi mawili ya Nyuki wa Kijani na Nyuki wa Njano.