Na mwandishi wetu
Kiungo wa Yanga, Jonas Mkude amesema tuzo ya mchezaji mwenye nidhamu aliyoipata kwenye mchezo wa Kombe la Mapinduzi dhidi ya KVZ itabadilisha mtazamo wa watu wengi dhidi yake.
Mchezaji huyo alisema watu wengi wamekuwa na mtazamo hasi juu yake kwamba ni mtu asiye na nidhamu kitu ambacho siyo kweli.

“Kwanza namshukuru kocha wangu Miguel Gamondi kwa kuniamini na kunipa nafasi ya kucheza mechi hizi za Kombe la Mapinduzi na tuzo hii itanisaidia kuondoa mawazo mabaya waliyokuwa nayo baadhi ya watu juu yangu kwamba sina nidhamu,” alisema Mkude.

Kiungo huyo ambaye ametua Yanga mwanzoni mwa msimu huu akitokea Simba, alisema siku zote yeye ni mtu anayezingatia nidhamu, iwe ndani au nje ya uwanja na hata shutuma ambazo amewahi kupewa huko nyuma mara nyingi zimekuwa na mrengo wa kumchafua.
Alisema mara nyingi huwa anapenda kukaa kimya akiamini ipo siku ukweli utajulikana na tuzo hiyo imedhihirisha kwamba yeye ni mtu wa aina gani.
Mkude ambaye pia katika mchezo huo ulioisha kwa suluhu kwenye Uwanja wa Amaan, Zanzibar, alivaa kitambaa cha unahodha, amesema ataendelea kujitumia kuipigania timu hiyo kubeba ubingwa wa michuano hiyo ambayo kwa sasa ipo hatua ya robo fainali.

Na Hassan Kingu
Mashabiki Yanga wamemjadili sana Jonas Mkude ‘Nungunungu; kama anafaa au hafai katika timu hiyo lakini kwa sasa nadhani imetosha, tumuachie kocha Miguel Gamondi afanye maamuzi kwenye kikosi chake.
Tetesi za Simba kuachana na Mkude zikiwa zimepamba moto, zikaibuka tetesi nyingine za kumhusisha na Yanga, Azam na Singida Fountain Gate, kwamba ni vipi mchezaji huyo atafaa kujiunga na moja ya timu hizo.
Mjadala huo hatimaye ukahamia katika klabu ya Yanga, na unaendelea hadi sasa, mashabiki wa timu hiyo na hata wale wasio wa timu hiyo wanamchambua mchezaji huyo kwa namna mbalimbali.
Nionavyo kumjadili Mkude kwa sasa ni sawa na kumkosea heshima kwa kuwa uamuzi umeshafanyika na ni vyema akasubiriwa ili kuonesha ubora wake kama kweli yuko vizuri au ameisha kama ambavyo baadhi ya watu wanadai.
Wanaojenga dhana kwamba Mkude ameisha wanasimamia katika hoja ya mchezaji huyo kukosa namba katika kikosi cha kwanza cha Simba kwamba klabu hiyo isingekuwa tayari kumuona anaondoka kama bado yuko katika ubora wake.
Wanaosimamia hoja hiyo hawajui au hawataki kukubali kwamba mchezaji huyo huyo anaweza kupata nafasi timu nyingine na kuonesha uwezo.
Hawataki kukubali kwamba mchezaji anaweza kupewa nafasi ya pili akadhihirisha ubora wake baada ya kocha kuamua kumtumia ama kwa kumbadili nafasi anayocheza au kumpanga na wachezaji ambao watamfanya awe tishio.
Katika mjadala wa Mkude nimeona mahali mitandaoni akifananishwa na Juma Kaseja aliyetoka Simba kwenda Yanga lakini hakuwa katika ubora uliozoeleka Simba, hapo hapo pia nilisoma mwingine akimtaja Ibrahim Ajibu kwamba hakuweza kuonesha ubora.
Wanaosimamia hoja hiyo hawajarudi nyuma wakamtaji Yusuf Ismail Bana, beki aliyetoka Simba akaenda Yanga na kuwa tishio, akaitawala beki ya kulia kwa muda mrefu.
Hawamtaji Zamoyoni Mogela, aliyetamba Simba na kuhamia Yanga akicheza vizuri eneo tofauti na kuwa tishio kiasi cha kubatizwa jina la DHL nchini Uganda.
Watu hao hao hawamtaji Method Mogela aliyetoka Simba na ubora wake na kuendelea na ubora huo huo katika kikosi cha Yanga lakini pia hawamtaji Hamis Gaga aliyetoka Simba akilalamikiwa kwa kuwa na tabia zisizopendeza lakini akiwa Yanga akaendeleza makali yake.
Nimetoa mifano hiyo kwa lengo la kuwataka wote wanaomshambulia Jonas Mkude kuacha kufanya hivyo, badala yake waheshimu uamuzi uliofanywa, wamuachie kocha afanye kazi yake, waamini kwamba mchezaji huyo naye bado ana nafasi ya kutamba.
Mwisho wa yote, ni miguu ya Mkude au Nungunungu ndiyo itakayotupa jibu, tuiache ‘izungumze’ na katika hilo tusiwe na haraka, muda utatupa jibu kama miguu ya Mkude ilipaswa kuwa Yanga au Yanga imekurupuka.
Vinginevyo kwa sasa hakuna maana yoyote kuanza kumjadili mchezaji tena katika namna mbaya wakati huu maamuzi yakiwa tayari yameshafanyika, ni mjadala unaoagawa mashabiki na kumkatisha tamaa mchezaji na kimsingi hauna maana yoyote.

Na Hassan Kingu
Simba imeachana na kiungo Jonas Mkude ambaye mbali na mashabiki kutaka kujua timu mpya atakayojiunga nayo lakini pia amewaachia kumbukumbu zilizogawanyika katika sura mbili.
Sura ya kwanza ya Mkude ni ile ya kiungo mahiri na mwenye uwezo ambaye kila shabiki wa Simba na hata Taifa Stars alifurahi kumuona akiwa amevaa jezi mojawapo ya timu hizo.
Kwa kipindi kirefu ambacho amekuwa Simba, Mkude au Nungunungu ameishi katika umahiri huo kiasi cha kumfanya awe kipenzi cha mashabiki kila mara anapokuwa uwanjani akiiwakilisha timu hiyo.
Mkude ana matukio mengi yaliyodhihirisha ubora wake lakini kwa harakaharaka umahiri wake ambao unaweza kukumbukwa zaidi na mashabiki wengi wa Simba au hata Yanga ni katika mechi ya Kariakoo Derby au Dar Derby, ni siku ambayo Mkude na Feisal Salum au Fei Toto waliteka nyoyo za mashabiki.
Kama mashabiki waliufurahia mpambano na Fiston Mayele na Joash Onyango au Mayele na Henock Inong basi mpambano mwingine wa kuvutia na kukumbukwa katika mechi hiyo ni wa Fei Toto na Mkude.
Mkude na Fei Toto kila mmoja alifanikiwa kuonesha uwezo wake katika kulitawala dimba la kati na kubwa zaidi waliinogesha mechi hiyo na kuwa na mvuto, waliwafurahisha mashabiki, waliipa hadhi Dar Derby, hadhi ambayo mashabiki wanaiihitaji.
Huko nyuma haikuwa ajabu kusikia Mkude yumo kwenye kikosi cha Stars, ubora na sifa anazotakiwa kuwa nazo mchezaji mahiri, alikuwa nazo Mkude, ni aina ya mchezaji ambaye angeweza kucheza katika kikosi cha kwanza cha timu yoyote ile Afrika.
Hiyo ndiyo sura ya kwanza ya Mkude, ambayo mashabiki hasa wa Simba wataendelea kumkumbuka wakati huo huo wakijiuliza nini hasa kimemkuta hadi akawa si tena mchezaji wa kikosi cha kwanza, si tena mchezaji anayeaminiwa kwenye mechi kubwa za Simba ikiwamo Dar Derby.
Si mchezaji ambaye unaweza kusema msimu uliopita alikuwa na mchango mkubwa katika mafanikio ya Simba hadi kufikia hatua ya robo fainali ya Ligi ya Mabingwa Afrika.
Hapo hapo ndipo tunapoipata sura ya pili ya Mkude, sura ya mchezaji wa kiungo ambaye amepoteza au amekubali kupoteza umahiri na ubora uliomfanya awe kipenzi cha mashabiki wa Simba, amepoteza hadhi aliyokuwa nayo.
Mkude ambaye ilikuwa panga pangua hakosekani kikosi cha kwanza taratibu akageuka na kuwa si tu mchezaji wa kusugua benchi bali wakati mwingine anakosekana hata katika wachezaji wa akiba.
Si Mkude ambaye ungetegemea kwenye Dar Derby apambane na Fei Toto au aisumbue safu ya kiungo ya Yanga, badala yake amekuwa Mkude mwingine ambaye hatimaye Simba imeamua kuachana naye.
Kwa sasa Mkude si tu hana nafasi Simba bali inaweza kuonekana ajabu jina lake likiwemo kwenye kikosi cha Stars, huko nyuma kukosekana kwa Mkude kungeacha maswali lakini leo hakuna maswali.
Katika sura ya pili ya Mkude kuna swali linalokuja kwamba nini hasa kimemkuta, je kashuka kiwango hadi kushindwa kupigania namba katika kikosi cha Simba kilichosheheni mastaa kutoka sehemu mbalimbali barani Afrika?

Je walichoweza kina Aboubakar Salum, Mudathir Yahya na Fei Toto na wengineo katika Yanga ndicho kilichomshinda Mkude hadi akajikuta hapati nafasi Simba na hatimaye akajikuta akiachwa?
Sura ya pili ya Mkude inamfikirisha kila shabiki na kuacha maswali, je ni kweli ameshuka kiwango au ni ile hadithi inayosikika kwamba si mtu mchezaji mwenye nidhamu, kwamba pamoja na uwezo wake wote tatizo la nidhamu limekuwa likimsumbua. Je ni kweli tatizo ni nidhamu pekee au kiwango kimeshuka?
Jibu la swali hili huenda likapatikana msimu ujao katika timu ambayo itamsajili Mkude, kama ni Yanga, Azam au kwingineko hapa hapa Tanzania au ataamua kuvuka mipaka ya nchi.
Yote kwa yote mashabiki walio wengi bado wanaitamani sura ya kwanza ya Mkude yaani Mkude au Nungunungu, kiungo mahiri ambaye hawajui nini hasa kimemkuta, ameshuka kiwango au ana tatizo jingine nje ya hilo?