Na mwandishi wetu
Kocha mkuu wa Yanga, Miguel Gamondi ameeleza kufurahishwa kwa kutengewa siku yake maalum katika mcihezo wao wa leo Jumatano dhidi ya Dodoma Jiji kwenye Uwanja wa Jamhuri, Dodoma.
Uongozi wa Yanga juzi ulitangaza kuwa kwa kutambua mchango wa kocha huyo, mchezo huo wa Dodoma utakuwa maalum kwake.
Yanga imekuwa ikifanya hivyo kwa wachezaji wake katika baadhi ya mechi lakini pia hivi karibuni katika mechi na mahasimu wao Simba waliyoshinda kwa mabao 2-1 ilikabidhiwa kwa Wazee wa Jangwani.
Gamondi alisema kwake ni faraja lakini anaona kama si yeye anayestahili hadhi hiyo kwani wapo wengi nyuma yake waliofanikisha mafanikio ya Yanga msimu huu.
Alisema kwamba ndio ambao wanastahili heshima na hadhi hiyo kutokana na mchango wao mkubwa wakiwemo wasaidizi wake wa benchi la ufundi.
“Kila wakati ni vizuri kutambulika na klabu, mashabiki juu ya uwepo wako lakini hii si ya kwangu binafsi, nyuma kuna kundi la watu waliofanikisha haya kuanzia watu wa benchi la ufundi, watu wanaofanya idara ya afya, ofisini, hawa wote wanafanya haya yawezekane na kuleta mafanikio.
“Labda ukizungumzia mimi pengine ninasimama upande wa maamuzi tu au kuleta mawazo na vitu vya namna hiyo lakini bila hawa wengine hakuna kinachofanyika.
“Nafikiri hii inawahusu wao, na hii si ya kwangu binafsi ila inawahusu wote waliofanya kazi ndani ya klabu hii na kuleta furaha kwa namna moja ama nyingine,” alisema Gamondi.
Kocha huyo raia wa Argentina aliyetua Yanga msimu huu akitokea Ittihad Tanger ya Morocco kurithi mikoba ya Nassredine Nabi aliyetimkia FAR Rabat, msimu huu amefanikiwa kutetea ubingwa wa Ligi Kuu NBC, kuipeleka Yanga robo fainali ya michuano ya Ligi ya Mabingwa Afrika na kuifikisha kwenye fainali ya Kombe la Shirikisho CRDB ambapo wataumana na Azam FC.

Na mwandishi wetu
Kocha mkuu wa Yanga, Miguel Gamondi amesema pamoja na furaha na anavyojivunia ubingwa wa Ligi Kuu NBC waliotwaa Jumatatu lakini anautoa ubingwa huo kwa mashabiki wote wa timu hiyo.
Gamondi, raia wa Argentina alisema kwamba amefanya hivyo kutokana na sapoti na upendo mkubwa waliowaonesha katika mechi zote walizoshiriki msimu huu.
Yanga iliandika historia ya kubeba ubingwa huo kwa mara ya 30 baada ya kuibutua Mtibwa Sugar mabao 3-1, Uwanja wa Manungu, Morogoro, mechi iliyopigwa Jumatatu iliyopita.
Gamondi alisema walistahili kutwaa ubingwa huo japo ulikuwa mgumu kutokana na ushindani uliokuwepo lakini walionesha wao ni nani na walionesha soka safi na la kuvutia kwa mashabiki zao wote na wapenda soka nchini.
“Najiskia furaha, najivunia lakini ni ubingwa wa Yanga, ni mara yangu ya kwanza kufanya hivi nikiwa na Yanga najivunia sana, tumeonesha sisi ni bora zaidi Tanzania.

“Ubora wetu si kwa ajili ya matokeo tu lakini tumecheza vizuri karibia msimu wote huu, wachezaji wamefanya kazi nzuri, na wale wote waliotusapoti tumefurahi na ningepeda kuupeleka ubingwa huu kwa Wananchi wote Tanzania,” alisema Gamondi.

“Nikiri msimu ulikuwa mgumu, ulianza kwa ugumu maana awali nilieleza wazi tunahitaji ubingwa na tunahitaji kufika mbali katika Ligi ya Mabingwa, na tulijua haya yote ni magumu na tulihitaji kujiandaa vizuri zaidi ya wapinzani wengine.
“Tulijiamini na wachezaji wengi wazuri waliongezeka msimu huu. Ninachoamini ni kuwa tulitengeneza mashine nzuri ya ushindi, tulishambulia vizuri na tulizuia kwa ustadi mkubwa sana,” alisema Gamondi.
Yanga imetwaa ubingwa huo kwa mara ya tatu mfululizo ikiwa na makocha wawili tofauti, awali ilifanya hivyo ikiwa chini ya kocha Munisia, Nassredine Nabi.
Hadi kutwaa ubingwa huo, Yanga imefanikiwa kufikisha pointi 71 dhidi ya Azam FC inayoshika nafasi ya pili ikiwa na pointi 60 ikifuatiwa na Simba iliyo nafasi ya tatu yenye poiti 57.

Na mwandishi wetu
Kocha mkuu wa Yanga, Miguel Gamondi amesema amefurahishwa kurejea kwenye uwanja mzuri na rafiki kuelekea mechi yao ya kesho Jumamosi ya Ligi Kuu NBC dhidi ya Coastal Union mechi itakayopigwa Uwanja wa Azam Complex, Dar es Salaam.
Gamondi raia wa Argentina, ameyasema hayo baada ya kupata suluhu dhidi ya JKT Tanzania katika mchezo wao wa mwisho wa ligi uliopigwa kwenye Uwanja wa Jenerali Isamuhyo.
Kocha huyo alisema kwamba uwanja huo haukuwa rafiki kutokana na kuharibiwa na mvua zinazoendelea kunyesha nchini na hivyo kuvuruga mipango yao mingi ya ushindi.
“Tumetoka kucheza mchezo wa kwenye mazingira magumu na tuna njaa ya kupata alama tatu. Hautakuwa mchezo rahisi kwa sababu Coastal ni wazuri kwenye kuzuia mashambulizi, lakini tumejipanga vizuri kuhakikisha tunafanya vizuri kwenye mchezo wa kesho,” alisema Gamondi.
“Mechi zinapokuwa karibu sana muda wa maandalizi unakuwa mdogo, jana tumefanya mazoezi ya kurejesha miili sawa kwa wachezaji na leo (Ijumaa) tutapata muda kidogo wa kujiandaa kwa ajili ya mchezo wa kesho na hapo ndipo nitajua wachezaji wa kuwatumia,” alisema Gamondi.
Mchezo wa kesho unahitaji sana ubora wa wachezaji na angalau tunaenda kucheza kwenye uwanja wenye mazingira mazuri, muhimu zaidi kesho ni kuweka mpira wavuni na kuibuka na ushindi,” alisema Gamondi.
Yanga ambayo inaongoza ligi kwa pointi 59 baada ya mechi 23, itaivaa Coastal iliyo kwenye nafasi ya nne na pointi zao 33 baada ya kushuka dimbani mara 23.

Na mwandishi wetu
Kocha wa Yanga, Miguel Gamondi amesema hana presha kuelekea mechi hiyo na Simba maarufu Kariakoo au Dar Derby kwa kuwa anakwenda kutengeneza timu bora kuhakikisha inaibuka na ushindi katika mchezo huo.
Gamondi amezungumza hayo Jumatatu hii mara baada ya kurejea Dar es Salaam wakitokea Mwanza walikopata ushindi wa mabao 3-0 dhidi ya Singida Fountain Gate, mechi iliyopigwa Jumapili iliyopita.
Gamondi alisema anafahamu wana mechi ngumu mbele yao lakini ana matumaini ya kufanya vizuri kutokana na maandalizi na mwendo wa timu yake huku pia akiwa hajihusishi na mitandao ya kijamii kwa kuwa inachangia kukuza presha ya mechi hiyo.
“Mimi nafanya kazi katika weledi, sisikilizi watu wanasemaje, nahitaji kuandaa timu vizuri kwa namna inavyowezekana katika njia sahihi ili tushinde mechi japo naiheshimu Simba na naheshimu kila timu inayoshiriki ligi.

“Kiukweli sina presha yoyote na sifuatilii mitandao ya kijamii ndiyo maana unaona sina presha sababu nafikiri moja ya kitu kibaya cha mitandao ni kuleta presha, kila mtu anataka kuongea analotaka na kwenye mpira si wengi wanaouelewa lakini kila mmoja atataka kuweka maoni yake na wakati mwingine ndivyo soka lilivyo kila mmoja anataka kukosoa,” alisema Gamondi.

Wakati Gamondi akizungumza hayo, Simba yenyewe imerejea pia Dar ikitokea Singida ilikotoka sare ya bao 1-1 dhidi ya Ihefu.
Meneja Habari wa Wekundu hao, Ahmed Ally amesema wanafahamu mechi hiyo ni ngumu na inatokana na matokeo ya ushindi ya Yanga kwa sasa lakini pia ukubwa wa mchezo wenyewe ila watajipanga kuhakikisha wanapambana na kupata matokeo.

Na mwandishi wetu
Kocha mkuu wa Yanga, Miguel Gamondi amesema kwamba timu yake imeporwa ushindi katika mechi ya robo fainali ya Ligi ya Mabingwa Afrika dhidi ya Mamelodi Sundowns baada ya kutolewa kwa penalti 3-2.
Yanga usiku wa kuamkia Jumamosi hii ilitolewa lakini timu hiyo ilipata bao dakika ya 59 mfungaji akiwa Aziz Ki ambaye shuti lake liligonga mwamba wa juu na kurudi uwanjani ingawa picha zilionesha mpira huo ulivuka mstari wa goli.
Kukataliwa kwa bao hilo kuliifanya mechi imalizike kwa dakika 90 matokeo yakiwa sare ya 0-0 kabla ya kuingia kwenye mikwaju ya penalti na Yanga kulala kwa penalti 3-2.
Akiizungumzia mechi hiyo, Gamondi alisema ilikuwa nzuri na kuisifu timu yake kwa kutengeneza nafasi nyingi za kufunga ingawa baada ya hapo hakutaka kuzungumzia mechi hiyo kwa kile alichodai kwamba kila kitu kilionekana.
Akifafanua kuhusu bao la Aziz Ki, kocha huyo alihoji ni kwa nini mwamuzi wa mchezo huo hakuwa tayari kwenda kuangalia VAR kujiridhisha badala yake alitegemea kupewa taarifa ingawa alifanya hivyo katika rafu ya Lomalisa, alijiridhisha na kumpa kadi ya njano.
Kocha huyo alikataa maswali na kusema kwamba Wananchi milioni 30 wa Tanzania wameporwa ushindi na kusisitiza kwamba kama kuna nia ya kulinda heshima ya soka la Afrika ni vyema kuanzia na tukio hilo.

“Shinda mechi ni sawa, hakuna tatizo lakini shinda kwa haki, heshima ya Watanzania leo imeporwa kwa kweli lile lilikuwa goli la wazi au kuna mtu anataka kujadiliana na mimi kuhusu hilo akiamini si goli, aseme,” alisema Gamondi kwa Kiingereza ambacho hakikuwa kizuri.

“Kama watu wa Sundowns wanafurahia hilo ni sawa lakini soka haliko hivyo, tunazungumzia Fair Play, Fifa wanazungumzia Fair Play,” alisema Gamondi.
Kocha huyo alifafanua kuwa hiyo ni mara ya pili anaporwa ushindi, mara ya kwanza ilikuwa mwaka 2018 kwenye Ligi ya Mabingwa Afrika alikutana na tukio kama hilo la kuporwa ushindi.
Alisema kwamba mwamuzi anaweza kufanya makosa kwa kuwa yeye ni binadamu lakini kwa nini hakwenda kuangalia VAR kujiridhisha badala yake alisema anajiamini lakini alimshangaa kwa kitendo cha kumpa kadi mchezaji wake (Lomalisa) baada ya kujiridhisha.
Gamondi alisema timu yake imepambana na timu bora ya Afrika na imefuzu Ligi ya Mabingwa Afrika hatua ya robo fainali kwa mara ya kwanza lakini inaishia kuporwa ushindi kwa namna ile.

Na mwandishi wetu
Kocha mkuu wa Yanga, Miguel Gamondi amesema kwamba wanafahamu ugumu ulio mbele yao katika mechi dhidi ya Mamemelodi Sundowns lakini watatafuta matokeo ugenini.
Kauli ya Gamondi imekuja wakati Yanga ikiwa imetua salama jijini Johannesburg, Afrika Kusini kwa mchezo huo ambao ni wa marudiano wa robo fainali ya Ligi ya Mabingwa Afrika.
Yanga itakipiga na Mamelodi Aprili 5, mwaka huu kwenye Uwanja wa Loftus Versfeld, Pretoria ikitafuta sare ya mabao au ushindi wa aina yoyote ili kufuzu hatua ya nusu fainali kwa mara ya kwanza baada ya matokeo ya 0-0 kwenye mchezo wa awali uliopigwa Uwanja wa Mkapa, Dar es Salaam.
“Mchezo ni mgumu, nafikiri mchezo utakuwa na presha inayofanana maana Sundowns wana presha ya kutaka kuingia nusu fainali sababu ni miongoni mwa wanaopewa nafasi ya kutwaa ubingwa.

“Na wao pia wanataka kushinda, washiriki kwenye michuano ya Klabu Bingwa Dunia lakini nategemea utakuwa mchezo wa mbinu na tutapambana kupata bao ugenini sababu kama nafasi tunatengeneza, tunachohitaji kuendelea kushikamana, nikiwaamini vijana wangu, natumai tutaingia nusu,” alisema Gamondi.

Kocha huyo raia wa Argentina pia alizungumzia uwezekano wa mabadiliko ya kikosi katika mchezo huo kutokana na maendeleo mazuri waliyonayo majeruhi wake.
Wachezaji majeruhi wa Yanga ni Pacome Zouzoua, Kouassi Yao na Khalid Aucho ambao wote walikosekana katika mchezo wa kwanza kutokana na kuwa na majeraha mbalimbali.

Na mwandishi wetu
Kocha mkuu wa Yanga, Miguel Gamondi amesema siku zilizobaki zinamtosha kuwapa wachezaji wake mbinu zitakazowapa ushindi katika mchezo wa Ligi ya Mabingwa Afrika dhidi ya Mamelodi Sundowns.
Kikosi cha Yanga kimeingia kambini jana Avic Town, Kigamboni kujiandaa kuikabili miamba hiyo ya Afrika Kusini katika mchezo wa robo fainali ya kwanza utakaochezwa Machi 30 kwenye Uwanja wa Mkapa, Dar es Salaam.
“Hakuna kinachoshindikana, wapinzani miaka ya karibuni wamekuwa kwenye kiwango bora lakini hata Yanga siyo timu ndogo ndio maana tupo kambini kuhakikisha tunajiandaa na kupanga mikakati madhubuti itakayotupa furaha baada ya dakika 180,” alisema Gamondi.
Alisema hawatishwi na mafanikio ya Mamelodi sababu hadi kufika hapo wamekutana na timu kubwa zenye ‘levo’ yao na wamepambana nazo na nyingine kuzifunga kwa hiyo wanachokifanya hivi sasa ni kuweka mitego ili wapinzani wao wanase na kuwapa furaha mashabiki wao na Watanzania.
Kocha huyo raia wa Argentina alisema anaridhishwa na maendeleo ya wachezaji wake waliokuwa majeruhi akiwemo kiungo Khalid Aucho na Pacome Zouzoua na anaamini hadi siku ya mchezo watakuwa tayari kwa ajili ya kutumika.
Gamondi alisema anaamini Yanga inakwenda kutengeneza rekodi nyingine kubwa Afrika kwa kuitoa Mamelodi na kutinga nusu fainali ya michuano hiyo ya Ligi ya Mabigwa Afrika msimu huu.

Na mwandishi wetu
Kocha mkuu wa Yanga, Miguel Gamondi, amesema ugumu wa ratiba ni chanzo cha kikosi chake kupoteza mchezo wa Ligi Kuu NBC dhidi ya Azam FC kwa mabao 2-1 kwenye Uwanja wa Mkapa, Dar es Salaam.
Huu unakuwa mchezo wa pili kwa Yanga kupoteza msimu huu baada ya kufungwa 2-1 na Ihefu ingawa Wananchi wameendelea kusalia kileleni mwa msimamo wa ligi kwa pointi 52 baada ya mechi 21, ikifuatiwa na Azam tenye pointi 47.
“Nina furaha lakini sijui kama nitaeleweka, niombe radhi kuna vitu nikiongea vitaleta picha nzuri, tulianza vizuri mchezo lakini kila mtu ameona kilichofanywa na mwamuzi alipokubali bao la kuotea,” alisema Gamondi kuhusu mechi hiyo iliyopigwa Jumapili iliyopita.
Alisema kitendo cha kucheza michezo mfululizo ya ligi kimeiathiri timu yake ingawa kama ataongea ataonekana kama anatafuta sababu ya kujitetea lakini sio sahihi kucheza mechi nne kwa siku 17.
“Hapa siongelei kuhusu Yanga pekee bali hata Simba kwa kucheza michezo nyumbani na kusafiri ugenini sio jambo rahisi hata kidogo, tumejitahidi sana kupambana,” alisema Gamondi.

“Ukichukua mambo yote haya ukaongeza muda na waamuzi ni chanzo cha kutokuwa bora, mwamuzi wa pembeni aliruhusu bao la kuotea lililowanufaisha wapinzani wetu,” alisema Gamondi

.
Yanga baada kupoteza mbele ya Al Ahly, Machi Mosi, ikaifuata Namungo, Uwanja wa Majaliwa Machi 8 na kuibuka na ushindi wa mabao 3-1, kisha ikashinda 5-0 dhidi ya Ihefu Machi 11, Uwanja wa Azam Complex kabla ya kuichapa Geita Gold 1-0 Machi 14 na Jumapili ikaumana na Azam.

Na mwandishi wetu
Kocha mkuu wa Yanga, Miguel Gamondi amewapongeza wachezaji wake kwa kuendelea kupata ushindi katika mechi za Ligi Kuu NBC licha ya uchovu unaotokana na ratiba ngumu.
Yanga jana Alhamisi iliifunga Geita FC bao 1-0, ushindi ambao umeendelea kuwaweka kileleni mwa msimamo wa ligi wakifikisha pointi 52 huku wakiwa na mchezo mmoja mkononi dhidi ya timu inayoshika nafasi ya pili, Azam FC.
“Pamoja na ushindi lakini hatukuwa bora kama inavyokuwa mechi zilizopita, tumekuwa tukicheza mechi kila baada ya siku mbili huu ni utaratibu wa ajabu, nilijua mchezo ungekuwa mgumu lakini nafurahi kuona licha ya uchovu walionao vijana wangu, tumepata pointi tatu hicho ndio kilikuwa cha muhimu,” alisema.
Kocha huyo alisema kutokana na kukabiliwa na mchezo mgumu dhidi ya Azam FC keshokutwa Jumapili, hawatofanya maandalizi yoyote ili wachezaji wake waitumie mechi dhidi ya Geita kama mazoezi na kupata muda mzuri wa kupumzika kwa ajili ya mchezo huo.
Naye kocha mkuu wa Geita FC, Denis Kitambi alisema kilichosababisha wapoteze mchezo huo ni wachezaji wake kucheza kwa kujihami wakiwahofia wapinzani wao Yanga.
Alisema kwa kufanya hivyo waliwaruhusu kuwashambulia, kitu ambacho ilikuwa ni kujiweka kwenye uhatari wa kuruhusu bao tofauti na kama wangekuwa wanajibu mapigo kwenda kwenye lango lao.
“Hatukuwa kwenye ubora wetu, tuliwakaribisha kwenye lango letu wakafanya wanavyotaka, kitu ambacho kilikuwa ni hatari kwetu, angalau kipindi cha pili tulijaribu kutoka kwenda kuwashambulia lakini muda ulishakwenda,” alisema Kitambi.