Na mwandishi wetu
Yanga imepangwa kundi moja na TP Mazembe ya DR Congo katika michuano ya Ligi ya Mabingwa Afrika wakati Simba ikipangwa kundi moja na CS Sfaxien ya Tunisia katika Kombe la Shirkisho Afrika.
Makundi hayo yametokana na droo ya michuano hiyo iliyofanyika Jumatatu hii mjini Cairo, Misri yalipo makao makuu ya Shirikisho la Soka Afrika (Caf).
Katika droo hiyo mbali na TP Mazembe, Yanga ambayo ipo Kundi A wapinzani wake wengine ni timu za AL Hilal ya Sudan na MC Alger ya Algeria.
Kwa upande wa Simba mbali na CS Sfaxien, timu hiyo iliyo Kundi A pia imepangwa pamoja na timu za FC Bravos Du Maquis ya Angola na CS Constantine ya Algeria.
Meneja Habari wa Simba, Ahmed Ally akizungumzia timu walizopangwa nazo alisema Simba imepangwa na wapinzani wapya ambao hawajawahi kukutana nao hapo kabla wakiwa katika ubora wao..
Akizungumzia malengo yao katika kundi hilo, Ally alisema kwamba wanachotaka ni kumaliza hatua ya makundi wakiwa na alama 16 na kusonga mbele hadi hatua ya robo fainali.

Alifafanua kwamba Simba matarajio yao hayaiishi kwa kwenda robo fainali tu bali kufikia hatua hiyo wakiwa na alama nyingi kwa kuvuka alama 13 walizopata siku za nyuma na kufikisha 16.
Naye Meneja Habari wa Yanga, Ally Kamwe alisema timu yao imepangwa na timu ambazo inazijua lakini tangu awali walishasema wako tayari kucheza na mpinzani yeyote na wakishirikiana kwa pamoja wanaweza kufanya vizuri.
Alisema kwamba wamepata wapinzani ambao anaamini mechi zao hazitakuwa nyepesi ila ni wapinzani ambao wana uwezo wa kushindana nao na kupata matokeo mazuri na hakuna linaloshindikana.

Yaounde, Cameroon
Rais wa zamani wa Shirikisho la Soka Afrika (Caf), Issa Hayatou aliyeliongoza shirikisho hilo kwa miaka 29, amefariki dunia jana Alhamisi akiwa na umri wa miaka 77.
Hayatou ambaye anatokea nchini Cameroon, aliingia kwenye uongozi wa Caf mwaka 1988 na kuongoza hadi mwaka 2017 lakini pia aliwahi kushika nafasi kadhaa za juu za uongozi wa Fifa.
Kwa upande wa Fifa, Hayatou aliwahi kuwa mjumbe wa kamati ya utendaji ambayo kwa sasa inajulikana kwa jina la Baraza la Fifa majukumu aliyoyashika kuanzia mwaka 1990 hadi 2017.
Hayatou pia amewahi kuwa rais wa muda wa Fifa kati ya mwaka 2015 na 2016 akishika nafasi ya Sepp Blatter aliyesimamishwa baada ya kuandamwa na kashfa za rushwa na matumizi mabaya ya fedha.
Baada ya kupata habari za kifo cha Hayatou, Rais wa Fifa, Gianni Infantino ametuma salamu za rambirambi akisikitishwa na kifo cha kiongozi huyo ambaye wakati wa ujana wake aliwahi kuwa mwanariadha na pia aliwahi kucheza mpira wa kikapu.
“Nimesikitishwa kusikia habari za kifo cha rais wa zamani wa Caf ambaye pia amewahi kuwa rais wa muda wa Fifa na mjumbe wa baraza la Fifa, Issa Hayatou,” alisema Infantino kupitia mtandao wa Instagram.
Infantino alimtaja Hayatou kuwa ni mtu aliyekuwa na mapenzi katika michezo na aliyejitoa katika maisha yake kwenye uongozi wa michezo.
“Kwa niaba ya Fifa natuma salamu za pole kwa familia, marafiki, jamaa wenzake wa zamani na wote wanaomfahamu, apumzike kwa amani,” alisema Infantino.
Agosti 2021, Hayatou alisimamishwa kwa mwaka mmoja na Fifa kwa kosa la kwenda kinyume na kanuni za maadili baada ya kusaini mkataba mkubwa wa soka mwaka 2016 na kampuni ya habari ya Lagardere ya nchini Ufaransa.

Cairo Misri
Timu za Tanzania zimewajua wapinzani wao katika michuano ya klabu inayoandaliwa na Shirikisho la Soka Afrika (CAF) ambapo Yanga wataanza na Vital’O ya Burundi, Azam FC dhidi ya APR ya Rwanda wakati Simba itaanzia raundi ya pili.
Kwa mujibu wa droo ya michuano hiyo iliyofanyika Alhamisi hii, Yanga na Azam zinazoshiriki Ligi ya Mabingwa Afrika zikipita hatua hiyo, Yanga itacheza na mshindi kati ya Sports Club Villa ya Uganda na Commercia Bank ya Ethiopia.
Nao Azam FC kama watafanikiwa kuitoa APR baada ya ushindi huo watacheza dhidi ya mshindi wa mechi kati ya JKU ya Zanzibar dhidi Pyramids ya Misri, timu anayoichezea mshambuliaji wa zamani wa Yanga, Fiston Mayele.
Simba ambayo inashiriki Kombe la Shirikisho Afrika itaanzia katika raundi ya pili kwa kucheza na mshindi wa mechi kati ya Uhamiaji ya Zanzibar na timu kutoka Libya ambayo bado haijatajwa.
Kwa mtazamo wa walio wengi Yanga, Azam na hata Simba zinapewa nafasi kubwa ya kushinda mechi zao za kwanza za michuano hiyo ambayo ni ya msimu wa 2024-25 na kwenda hatua ya makundi.
Wawakilishi wengine wa Tanzania katika michuano hiyo, Coastal Union ambao watashiriki Kombe la Shirikisho wao wataanza kwa kuikabili ya Bravos do Maguis ya Angola na kama watapita mtego wa Waangola hao mechi inayofuata wataumana na FC Lupopo ya DR Congo.
Kwa Tanzania Yanga na Simba hadi sasa ndizo timu zenye rekodi nzuri katika michuano ya klabu Afrika, Yanga ilifikia hatua ya fainali Kombe la Shirikisho mwaka 2023 wakati Simba ina rekodi nzuri ya kufikia hatua ya robo fainali ya Ligi ya Mabingwa kwa misimu minne mfululizo.
Katika msimu uliopita wa 2023-24, Yanga na Simba zote zilifikia robo fainali ya Ligi ya Mabingwa ambapo Yanga ilitolewa na Mamelodi Sundowns ya Afrika Kusini na Simba ikatolewa na Al Ahly ya Misri.

Na mwandishi wetu
Simba na Yanga kesho Jumanne zitawafahamu wapinzani wao kwenye hatua ya robo fainali ya Ligi ya Mabingwa Afrika katika droo itakayochezeshwa jijini Cairo, Misri kuanzia saa 1.00 jioni kwa saa za Afrika Mashariki.
Timu nyingine ambazo ziko kwenye droo hiyo ni Al Ahly (Misri), ASEC Mimosas (Ivory Coast), Mamelodi Sundowns (Afrika Kusini), Atletico Petroleos (Angola), TP Mazembe (DR Congo), na Esperance Sportive de Tunis ya Tunisia.
Michezo ya awali ya hatua ya robo fainali inatarajiwa kupigwa kati ya Machi 29 na 30 huku michezo ya marejeano ikitarajiwa kuchezwa kati ya Aprili 5 na 6, mwaka huu.
Kulingana na kanuni, Yanga na Simba ambao wote wamemaliza wa pili katika makundi yao, mmoja wao anaweza kukutana na Mamelodi Sundowns ya Afrika Kusini kwa mara ya kwanza katika historia yao.
Mamelodi Sundowns tangu ianzishwe mwaka 1970, haijawahi kukipiga na Yanga na Simba hivyo kuufanya mchezo huo kusubiriwa kwa hamu na wapenzi wengi wa mpira wa miguu hapa nchini.
Sundowns wametawala soka la Afrika Kusini kwa kushinda taji hilo kwa misimu mitano mfululizo 2018/2019, 2019/2020, 2020/2021, 2021/2022 na 2022/2023 na kwa sasa ndio vinara wa Ligi Kuu Afrika Kusini wakiwa na pointi 42 baada ya mechi 16.
Petro de Luanda kutoka Angola pia inaweza kuwa wapinzani wa Yanga au Simba kulingana na droo ya CAF, ni miongoni mwa timu bora katika robo fainali ya Ligi ya Mabingwa baada ya kumaliza hatua ya makundi wakiwa na rekodi nzuri ya pointi 12 bila kupoteza mchezo wowote.
Kuhusu Al Ahly, Simba imekutana mara nne kwenye Ligi ya Mabingwa miaka ya karibuni na mara mbili katika Afrika Football League (AFL).
Simba imeshinda mara mbili, Al Ahly wameshinda mbili na kutoka sare mara moja. Kwenye AFL, Al Ahly walitoka sare ya 2-2 kwenye Uwanja wa Mkapa, Dar es Salaam na mchezo wa marudiano ulimalizika kwa sare nyingine ya 1-1 Oktoba, mwaka jana.
Yanga na Asec Mimosas pia wanaweza kukutana baada ya kuwa wameshakutana mara mbili kwenye historia, Yanga wakipoteza 3-0 nyumbani na baadaye 2-1 ugenini kwenye hatua ya makundi ya Ligi ya Mabingwa mwaka 1998.
Asec Mimosas ni moja ya timu bora kwenye mashindano hayo ikiwa na uzoefu mkubwa kwenye Ligi ya Mabingwa. Wamemaliza nafasi ya kwanza Kundi B wakiwa na pointi 11, pia wameshinda taji la Ligi Kuu Ivory Coast mara 29 na taji la Ligi ya Mabingwa mwaka 1998.

Na mwandishi wetu
Waamuzi wa soka Tanzania, Kassim Mpanga, Nassir Salum, Ahmed Arajiga (pichani) na Frank Komba, wameteuliwa na Shirikisho la Soka Afrika (CAF) kuwa waamuzi wa mechi za kuwania kombe la Shirikisho Afrika (CAFCC).
Taarifa ya Shirikisho la Soka Tanzania (CAF) iliyopatikana Jumatano hii ilieleza kuwa waamuzi hao watachezesha mechi kati ya FC Lupopo ya DR Congo itakayoumana na Sekhukhune United ya Afrika Kusini, itakayopigwa Septemba 16 mwaka huu.
Katika soka la wanawake waamuzi wengine wa Tanzania, Tatu Malogo na Glory Tesha wameteuliwa kuwa waamuzi wa mechi ya kuwania kufuzu michuano ya Wanawake Afrika (AWC 2024) kati ya Uganda na Algeria itakayopigwa Septemba 20 mwaka huu.
Wakati huo huo viongozi wawili wa soka nchini, Somoe Ng’itu ambaye ni kaimu mwenyekiti wa Chama cha Soka la Wanawake Tanzania na Khalid Abdallah ambaye ni mjumbe wa kamati ya utendaji ya TFF nao wameteuliwa na CAF kuwa wasimamizi wa mechi za michuano ya Afrika.
Ng’itu ameteuliwa kuwa kamisaa wa mechi ya kufuzu mashindano ya Afrika kwa Wanawake (AWC-2024) kati ya Ethiopia na Burundi itakayochezwa Septemba 26 mwaka huu wakati Abdallah yeye ameteuliwa kuwa kamishna wa mechi ya Kombe la Shirikisho (CAFCC) kati ya Arta Solar ya Djibouti na Zamalek ya Misri itakayopigwa Septemba 16 kwenye Uwanja wa Azam Complex, Dar es Saalaam.

Na mwandishi wetu
Vinara wa Ligi Kuu NBC, Yanga wataanza kuumana na ASAS Télécom ya Djibout kwenye hatua ya awali ya Ligi ya Mabingwa Afrika wakati Simba ikisubiri kucheza raundi ya pili na mshindi baina ya African Stars ya Namibia au Power Dynamos ya Zambia.
Shirikisho la Soka Afrika (Caf) leo Jumanne limepanga droo hiyo pamoja na ile ya Kombe la Shirikisho Afrika ambako Tanzania inawakilishwa na timu za Azam, Singida Fountain Gate na JKU.
Simba itaanzia hatua ya raundi ya pili ya Ligi ya Mabingwa kwa kuwa ipo katika kundi la timu 10 bora barani Afrika.
Yanga ambayo itaanzia ugenini dhidi ya ASAS, ikifanikiwa kuvuka hatua hiyo, itapepetana na mshindi baina ya mabingwa wa Congo, AS Otoho na El Merreikh ya Sudan iliyomaliza nafasi ya pili kwenye ligi chini ya Al Hilal.
KMKM kutoka visiwani Zanzibar yenyewe itaanza kwa kuumana na St. George ya Ethiopia na ikivuka hapo ni uso kwa uso na mabingwa watetezi wa Ligi ya Mabingwa, Al Ahly.
Kwenye Kombe la Shirikisho, Azam imepangwa kucheza dhidi ya Bahir Dar Kenema waliomaliza nafasi ya pili kwenye Ligi ya Ethiopia na mshindi baina yao atapambana na Club Africain ya Tunisia.
Na Singida FG inayoshiriki michuano hiyo kwa mara ya kwanza itacheza na ndugu zao JKU kutoka Zanzibar, kisha mshindi atavaana na Future FC ya Misri.
Mechi za mkondo wa kwanza za hatua ya awali za Ligi ya Mabingwa zitachezwa kati ya Agosti 18 mpaka 20 wakati marudiano zikitarajiwa kupigwa Agosti 25, mpaka 27, mwaka huu.

Na mwandishi wetu
Kiungo mshambuliaji wa Yanga, Stephanie Aziz Ki ameshinda bao bora la wiki la hatua ya nusu fainali ya kwanza ya michuano ya Kombe la Shirikisho Afrika.
Aziz Ki alifunga bao hilo kwenye ushindi wa mabao 2-0 walioupata Yanga dhidi ya Marumo Gallants ya Afrika Kusini, mchezo uliopigwa kwenye Uwanja wa Mkapa, Dar es Salaam Jumatano iliyopita. Bao jingine la Yanga lilifungwa na Bernard Morrison.
Shirikisho la Soka Afrika (Caf) kupitia kurasa zake za mitandao ya kijamii leo Jumatano waliweka video ya bao alilofunga mchezaji huyo na kutangaza kuwa ndio bao bora la wiki la mkondo wa kwanza hatua ya nusu fainali.
“Aziz Ki anajua jinsi ya kuzifungua nyavu za wapinzani. Goli la wiki la michuano ya Kombe la Shirikisho Afrika hatua ya nusu fainali limekwenda kwa mshambuliaji wa Yanga,” yaliambatanishwa maneno hayo kwenye video ya bao hilo.
Yanga leo Jumatano imeshuka kwenye Uwanja wa Royal Bafokeng, Rustenburg kwenye mchezo wa pili wa hatua hiyo dhidi ya Marumo na kuibuka na ushindi wa mabao 2-1 na hivyo kusonga mbele kwa ushindi wa jumla wa mabao 4-1.
Mabao ya Yanga katika mechi hiyo ambayo Aziz Ki alicheza akitokea benchi, yalifungwa na Fiston Mayele na Kennedy Musonda wakati bao pekee la Marumo lilifungwa na Ranga Chivaviro

Ushindi wa Yanga na kufuzu nusu fainali ya michuano hiyo ya Afrika ni tukio kubwa la kihistoria kwa timu hiyo ambayo pia ipo katika nafasi nzuri ya kubeba taji la Ligi Kuu NBC kwani ndiyo inayoongoza ligi hiyo hadi sasa.
Yanga pia ipo hatua ya nusu fainali ya Kombe la Shirikisho Azam au FA na hivyo ina nafasi ya kulibeba taji hilo.
Kwa maana hiyo iwapo mambo yatakwenda kama wanavyotaka mashabiki, timu hiyo itajiwekea rekodi ya kubeba mataji matatu katika msimu huu wa 2022-23 unaoelekea ukingoni.
Kwenye Kombe la Shirikisho Afrika, Yanga imefuzu nusu fainali ikineemeka na ushindi wa mabao 2-0 katika mechi ya awali iliyopigwa ugenini nchini Nigeria kabla ya sare ya bila kufungana Jumapili hii jijini Dar es Salaam.
Yanga sasa inajiandaa kuumana na Marumo Gallants ya Afrika Kusini katika mechi ya nusu fainali ambapo timu hiyo itaanzia ugenini Mei 10 kabla ya kurudiana, mechi ambayo Yanga itakuwa mwenyeji.
Marumo nayo imejikatia tiketi yake ya nusu fainali baada ya kuibwaga, Pyramids kwa bao 1-0 katika mechi nyingine ya robo fainali na hivyo kufuzu kwa ushindi wa jumla wa mabao 2-1.
Kocha wa Yanga, Nabi katika mechi hiyo aliamua kumpanga kuanzia mwanzo mshambuliaji wake kinda, Clement Mzize ambaye hata hivyo alishindwa kuzitumia vizuri nafasi mbili kuipa Yanga mabao.
Mshambuliaji nyota wa Yanga, Fiston Mayele naye katika dakika ya 51 alishindwa kuipa Yanga bao baada ya kuunganishiwa pande na Mudathir Yahya lakini akiwa yeyey na kipa wa Rivers alishindwa kuipa Yanga bao.
Nabi pia katika mechi hiyo alimpa nafasi winga wake Benard Morrison ambaye katika siku za karibuni amekuwa akisugua benchi baada ya kuandamwa na balaa la kuwa majeruhi. Morisson aliingia kuchukua nafasi ya Aziz Ki.
Mechi hiyo hata hivyo iliingia utata baada ya kutokea adha ya kukatika umeme kwenye Uwanja wa Mkapa na hivyo mwamuzi kulazimika kusimamisha mchezo kwa takriban nusu saa kuanzia dakika ya 24.
Hili linakuwa tukio la pili la kuzimika kwa taa wakati mechi ikiendelea kwenye Uwanja wa Mkapa ambao hivi karibuni Serikali ilitoa taarifa kwamba ina mpango wa kuufanyia matengenezo.
Awali tukio la taa kuzimika lilitokea kwenye uwanja huo katika mechi ya hivi karibuni ya kuwania kufuzu Kombe la Mataifa ya Afrika kati ya Taifa Stars na Uganda Cranes ambapo mwamuzi alilazimika kusimamisha mchezo kwa dakika 30 kabla ya kuendelea.

Na Hassan Kingu
Michuano ya klabu Afrika ipo kwenye hatua ya robo fainali na timu za Tanzania zimefanikiwa kusonga kwenye hatua hiyo kati ya timu 16 zilizobaki kwenye michuano hiyo.
Simba imepangiwa kucheza na mabingwa watetezi wa Ligi ya Mabingwa Afrika, Wydad Casablanca kutoka Morocco na kwenye Kombe la Shirikisho, Yanga itaumana na Rivers United ya Nigeria.
Ni michezo migumu kwa timu zote kutokana na uhalisia wa uyakinifu wa hatua hiyo kwa waliojitutumua kufika hapo huku zikiwa zimesalia mechi chache kabla ya kubainika bingwa mpya hivyo kila mmoja hutoa jicho, ufundi, utalaam, ujuzi na ubora wa hali ya juu ili kutimiza ndoto zake.
Simba na Yanga zimefanikiwa kufika hapo kwa kukusanya pointi za kutosha katika mechi sita za makundi zilizotokana na ushindi wa mechi zao kwa kufunga mabao ya kutosha.
Katika hatua ya makundi Simba imefunga mabao 10 na Yanga imefunga mabao tisa. Mabao yote ya Simba yamefungwa na wachezaji wa kigeni; Clatous Chama, Jean Baleke, Sadio Kanoute na Henock Inonga.
Mabao ya Yanga pia, saba yamefungwa na Fiston Mayele, Tuisila Kisinda, Kennedy Musonda na Jesus Moloko isipokuwa mawili pekee yaliyofungwa na wazawa Farid Mussa na Mudathir Yahya ambao wote waliwafunga TP Mazembe.
Hongera kwa Mudathir kuibuka mfungaji wa bao bora wa hatua ya makundi ya Kombe la Shirikisho akiwa ni mchezaji pekee wa Yanga kuingia kwenye kinyang’anyiro hicho.
Pamoja na kazi safi ya Mudathir lakini bado wachezaji wazawa wa Simba na Yanga wanapaswa kujiuliza shida ni nini? Timu za nyumbani kwao zinafanya vizuri lakini sio wao wanaofanya vema kwenye namba za magoli!
Katika orodha ya wafungaji bora wa Kombe la Shirikisho Msenegali, Paul Acquah wa Rivers ana mabao manne akiwa amefungana na Muivory Coast, Aubin Kouame wa Asec Mimosas ya nchini kwao na Ranga Chivaviro anayekipiga Marumo Gallants ya kwao Afrika Kusini.
Kisha wanafuatia, Mmisri Mostafa Fathi wa Pyramids (Misri), Mcongo, Malanga Mwaku (St. Lupopo, DRC), Boubacar Traore raia wa Mali anayekipiga US Monastir (Tunisia) na Mayele ambao wote wamefunga mara tatu.

Kwenye Ligi ya Mabingwa, Mmorocco Hamza Khabba wa Raja Casablanca (Morocco) anaongoza kwa mabao matano. Anafuatiwa na Mcongo, Makabi Lilepo wa Al Hilal (Sudan), Mmisri, Mahmoud Kahraba wa Al Ahly (Misri) na Chama waliofunga mabao manne kila mmoja.
Ukisoma kwa makini hiyo orodha, utagundua kwenye wengi waliopo hapo wanakipiga kwao na wanaiwakilisha nchi moja kwa moja lakini Tanzania utaona inawakilishwa na wageni.
Kwa kinachotokea kwa timu za Tanzania si dhambi lakini si jambo jema kwenye ukuaji wa soka la nchi na pia ni jambo la kuwafanya wachezaji wazawa kujiuliza kulikoni.
Ni kweli kwamba wachezaji wa kigeni wanapaswa kufanya kazi maradufu kwa sababu huduma na pesa wanazopata ni nyingi pia lakini hii haiwazuii wazawa kuonesha ubora wao, kulipigania taifa kupitia klabu ya nyumbani na mwisho ni mafanikio ya taifa unalotokea na mafanikio binafsi ya kwenda kukipiga kwingine na kutengeneza pesa zaidi.

Pia ni kama vile hili suala haliwasumbui wazawa, wanachukulia sawa tu wageni kuja kuchota pesa na kuondoka na rekodi za Afrika wakati wao wapo na wao ndiyo haswa uwakilishi wa Afrika unawahusu kwa timu za nyumbani.
Ukiachana na Afrika, hata ukienda Ulaya au Amerika kwenye ligi zao nyingi ‘homeboys’ wanachangamka kweli kweli kwenye orodha za mafanikio binafsi ya ligi bila ya kuangalia kiasi cha pesa wanacholipwa wala kupima mizani ya huduma anazopewa.
Kama upo kwenye timu inayoshiriki kimataifa, kwa nini usioneshe uwezo ukipewa nafasi? Usikubali kuwa mchezaji wa kuziba nafasi mwingine akiwa hayupo, ‘pambania kombe’.
Wazawa mnapaswa kuamka, bado mna nafasi na huu ndiyo wakati sahihi hasa kipindi hiki ambacho soka la Tanzania linapiga hatua kila dakika, msibaki nyuma, msikubali kupitwa na muda ambao ni wa kwenu na upo kwenye mikono yenu.
Hii inawahusu wanaocheza safu za ushambuliaji wa Simba, Kibu Denis, Habibu Kyombo, Mohamed Mussa na wengine ambao wanacheza nafasi nyingine lakini wana ustadi wa kufunga kama Jimmyson Mwanuke na Nassoro Kapama.
Pale Yanga kuna Dickson Ambundo, Denis Nkane, Crispine Ngushi, Clement Mzize ambaye angalau amekuwa akicheka na nyavu mara kwa mara kwenye michuano mingine lakini bado kuna nguvu inahitajika kuoneshwa hata kwenye michuano ya kimataifa inapotokea wamepata nafasi.
Muda mwingine maisha ya soka huwiana na maisha ya kawaida kwa maana ya unapopata nafasi itumie kikamilifu na kamia kutimiza lengo la msingi lililokuweka uwanjani maana huwezi kujua baada ya hapo matokeo yake yanakwenda kugusa wangapi.

Yawezekana mchezaji akaamini anafanya kwa ajili yake tu lakini pengine kupambana kwake sasa hivi kunaweza kuwa chachu ya kuwaaminisha vijana na watoto wengi ambao wanatamani kupata nafasi kama hizo lakini wana hofu juu ya wachezaji wa kigeni.
Hofu hii waanze kuondolewa kwa kuonesha mfano na kaka zao, wafute fikra potofu juu ya kushindwa kupambana na mgeni.
Kila kitu kinawezekana kama kutakuwa na nia kweli na hasira ya mafanikio. Miaka ya nyuma, iliaminika kutoka kimpira lazima uzunguke kwenye mataifa mengine Afrika, ni kweli lakini sasa angalau unaweza kutoboa ukiwa hapa hapa Tanzania.
Mifano mingi tunayo, haina haja ya kuanza kuwataja kina Novatus Dismas na wengine lakini ifahamike wakati ndiyo huu, biashara ya soka Tanzania kwa sasa imeanza kuwa kubwa, sasa kwa nini wazawa tusinyanyuke nayo?

Cairo, Misri
Yanga itaanza kuisaka tiketi ya nusu fainali Kombe la Shirikisho Afrika kwa kuivaa Rivers United ya Nigeria wakati Simba wataanza kuisaka tiketi hiyo katika Ligi ya Mabingwa kwa kuumana na Waydad Casablanca ya Morocco.
Hatua hiyo imefikiwa baada ya droo iliyofanyika Jumatano hii usiku na sasa wawakilishi hao pekee wa Tanzania na Afrika Mashariki wataanza kupigania tiketi hiyo kati ya Aprili 23 ambapo Yanga itaanzia ugenini na kurudiana Aprili 30 jijini Dar es Salaam.
Kwa upande wa Ligi ya Mabingwa kazi itaanza kati ya Aprili 21 au 22 ambapo Simba itaanzia jijini Dar es Salaam kabla ya timu hizo kurudiana wiki moja baadaye katika jiji la Casablanca nchini Morocco.
Yanga bado inakumbukumbu mbaya ya Rivers ambapo mara ya mwisho timu hizo zilikutana mwaka 2021 kwenye Ligi ya Mabingwa ambapo Yanga ilipoteza mechi zote mbili.
Katika mechi ya kwanza nyumbani Yanga ililala kwa bao 1-0 kabla ya kukutana na kipigo kama hicho katika mechi ya marudiano ugenini mjini Portha.
Kwa hali hiyo, Yanga ni kama vile imepata nafasi ya kulipa kisasi dhidi ya timu ambayo iliwatoa kwenye mashindano hayo ya Afrika mwaka 2021.

Nusu fainali za Ligi ya Mabingwa na Kombe la Shirikisho zote zitachezwa kati ya Mei 14 na 21 na baada ya hapo washindi wataumana katika hatua ya fainali kati ya Juni 4 na 11 kwa mtindo wa nyumbani na ugenini.
Mechi za robo fainali Ligi ya Mabingwa ni kama ifuatavyo…
Simba vs Wydad Athletic
Al Ahly vs Raja Casablanca
CR Belouizdad vs Mamelodi Sundowns
Kabylie vs Esperance
Mechi za robo fainali Kombe la Shirikisho ni kama ifuatavyo…
Pyramids v Marumo Gallants
US Monastir v ASEC Mimosas
USM Alger v FAR Rabat
Rivers Utd v Yanga