Na mwandishi wetu
Uongozi wa timu ya Singida Fountain Gate umebariki kuondoka kwa aliyekuwa kiungo wao, Bruno Gomes (pichani) lakini umeahidi kuisuka upya timu hiyo ili msimu ujao irudi kwenye ushindani.
Gomes alieleza jana Jumatatu kumalizana na klabu hiyo kwa madai ya kukiukwa kwa baadhi ya vitu kwenye mkataba wake jambo ambalo hajapendezwa nalo.
Makamu Mwenyekiti wa Singida, John Kadutu alisema kuna mambo mengi wamekusudia kuyafanya kwenye kikosi chao ikiwemo usajili wa nguvu ili kuiimarisha timu hiyo ili irudi katika ushindani iliyokuwa nao hapo awali.

“Unajua tangu kuanza mzunguko wa pili tumekuwa na mwenendo mbaya na hiyo imetokana na mambo mengi kutokuwa sawa ikiwemo baadhi ya wachezaji muhimu kuondoka na jana (leo) Bruno ameomba kuondoka, tumeridhia,” alisema Kadutu.

Kiongozi huyo alisema mikakati yao ni kukisuka upya kikosi chao ili msimu ujao warudi kiushindani zaidi kama ilivyokuwa mwanzoni mwa msimu huu.
Singida imeendelea kuporomoka kwenye msimamo wa Ligi Kuu NBC kwa sasa inashika nafasi ya nane ikiwa na pointi 21 katika michezo 19 iliyocheza hadi sasa.
Pia haijafahamika kiungo huyo Mbrazili aliyejiunga na Singida misimu miwili iliyopita anakwenda wapi ambapo licha ya msimu uliopita kufanya vizuri kwa kufunga mabao 10 na kuzivutia Simba na Yanga lakini msimu huu ameshindwa kuwika kutokana na majeraha ya mara kwa mara, akifunga bao moja pekee mpaka sasa.

Na mwandishi wetu
Kiungo wa Singida Big Stars, Bruno Gomes amekana fununu za kuwaniwa na Yanga, akisema anachotaka kwa sasa ni kuisaidia timu yake kumaliza Ligi Kuu NBC nafasi za juu ili kuacha historia itakayomfanya akumbukwe.
Bruno amekuwa akihusishwa kuhitajika Yanga na anatajwa huenda msimu ujao akajiunga nao katika dirisha kubwa la usajili.
Mchezaji huyo raia wa Brazil alisema anatamani kuiona timu yake inapata mafanikio na hasa kumaliza nafasi nne za juu na kwamba tetesi juu yake kwamba amefuatwa na Yanga si za kweli.
“Hakuna timu yoyote ligi kuu iliyonifuata kutaka huduma yangu, ninachotamani kwa sasa ni kufanya kazi kwa bidii na kuisaidia Singida kuwa katika nafasi ya juu kwenye ligi na kulikuza jina la Singida Big Stars.

“Malengo yangu ni kufanya kazi kwa bidii na kuisaidia Singida kuwa kileleni na kusaidia jina la timu kukua kwa kuvaa hii jezi ya Singida, natamani kukumbukwa popote niendapo kwa huduma nitakayotoa nikiwa hapa (Singida),” alisema Gomes.

Bruno amekuwa akifanya vizuri kwa sasa, kiasi cha kutajwa kuwakuna mabosi wa Yanga na kuhitaji huduma yake msimu ujao.
Licha ya kucheza nafasi ya kiungo, amefanikiwa kufunga mabao tisa hadi sasa kwenye ligi, nyuma ya kinara Fiston Mayele wa Yanga aliyefunga mabao 15 na Saido Ntibazonkiza na Moses Phiri wa Simba waliofunga mabao 10 kila mmoja.
Singida BS iliyopanda kushiriki ligi kuu msimu huu imekuwa ikifanya vizuri tangu kuanza kwa msimu, ikishikilia nafasi ya tatu baada ya mechi 25, ikiwa imeshinda mechi 14, sare sita na kupoteza mitano na kujikusanyia pointi 48.

Na mwandishi wetu
Kiungo mshambuliaji wa Singida Big Stars, Bruno Gomes amechaguliwa kuwa mchezaji bora wa mwezi Januari wa Ligi Kuu NBC msimu huu huku tuzo ya kocha bora ikitua kwa kocha wa timu hiyo, Hans Pluijm.
Kwa mujibu wa taarifa ya Bodi ya Ligi Kuu leo kwa vyombo vya habari, kikao cha Kamati ya Tuzo za TFF kilichofanyika Dar es Salaam wiki hii, kilimchagua Gomes baada ya kuonesha kiwango bora kwa mwezi huo akifunga mabao mawili katika mechi mbili zilizochezwa mwezi huo.
Singida Big iliifunga Kagera Sugar ya Kagera bao 1-0 na kupata ushindi mwingine kama huo dhidi ya Azam FC huku Gomes (pichani juu) aking’ara katika mechi hizo.
Gomes raia wa Brazil aliwashinda wachezaji Ibrahim Abdallah wa Namungo na Henock Mayala wa Polisi Tanzania alioingia nao fainali.
Kwa upande wa Pluijm, aliwashinda Roberto Oliveira wa Simba na Nasreddine Nabi wa Yanga alioingia nao fainali baada ya kuiongoza Singida Big Stars kushinda michezo miwili na kuendelea kushika nafasi ya nne katika msimamo wa Ligi Kuu NBC.
Kamati hiyo ya tuzo pia, imemchagua Meneja wa Uwanja wa Highland Estates uliopo Mbarali, Mbeya, Malule Omary kuwa meneja bora wa uwanja kwa mwezi Januari kutokana na kufanya vizuri katika menejimenti ya matukio ya michezo pamoja na masuala yanayohusu miundombinu uwanjani.