Na mwandishi wetu
Simba hatimaye imefuzu hatua ya robo fainali Kombe la Shirikisho Afrika baada ya kutoka sare ya bao 1-1 na Bravos ya Angola, mechi iliyopigwa leo Jumapili, Januari 12, 2025.
Kwa matokeo hayo Simba inakuwa imefikisha pointi 10 ambazo haziwezi kufikiwa na Bravos na CS SFaxien na timu hiyo sasa inaungana na CS Constantine kuwa timu zilizofuzu za Kundi A.
Simba iliyokuwa ugenini ilipambana na kulazimika kusawazisha bao lililofungwa na Leonel Ateba baada ya Bravos kuwa wa kwanza kupata bao dakika ya 13 lililofungwa na Aberdnego akiyatumia makosa ya beki wa Simba, Che Malone Fondoh.
Che Malone ambaye hucheza kwa kujiamini, aliunasa mpira akiwa kwenye eneo la Simba na kumrudishia kipa wake Mussa Camara kwa pasi fupi na kipa hyuyo kushindwa kuuwahi mpira huo na ndipo Aberdnego akaupiga kwa juu na mpira kujaa wavuni Camara akiwa ametoka.
Simba ilianza kusaka bao hilo kwa mashambulizi ya mara kwa mara langoni mwa Bravos kuanzia dakika za 38 na 39 ambapo mara zote hizo mipira ya kichwa iliyopigwa na Kibu Dennsi, mmoja ulitoka nje ya lango na mwingine kugonga mwamba.
Kipindi cha pili Simba ilikianza kwa kufanya mabadiliko ikiwatoa Yusuf Kagoma na nafasi yake kuingia Deborah Fernandes na dakika saba baadaye akatolewa Elly Mpanzu na kuingia Ladal Chasambi.
Mabadiliko hayo yalizidi kuiongezea uhai Simba kwa kufanya mashambulizi huku Bravos wakiwa na kazi ya kuokoa na kufanya mashambulizi machache ya kuvizia.
Kasi ya Simba hatimaye ilizaa matunda dakika ya 68 kwa bao la Ateba ambaye aliunasa mpira uliotokana na krosi ya chinichini ya Shomari Kapombe na kufumua shuti lililojaa wavuni.

The post Simba yafuzu robo fainali Shirikisho first appeared on Greensports: Michezo na Burudani.