Na mwandishi wetu
Kocha wa Simba aliyeachana na timu hiyo, Abdelhakh Benchikha amesema uamuzi alioutaja kuwa ni mgumu wa kuachana na klabu hiyo hautokani na tatizo lolote la uongozi bali ni tatizo la afya ya mkewe.
Akizungumza kwa lugha ya kiarabu katika taarifa iliyopatikana kwenye mitandao ya klabu hiyo, Benchikha alisema anataka wapenzi na mashabiki wa Simba waelewe kuhusu uamuzi huo aliodai kuwa ni mgumu na ambao hata yeye unamuumiza.
Alifafanua kwamba kuondoka kwake hakutokani na tatizo lolote katika klabu ya Simba badala yake anataka mashabiki na wapenzi wa klabu hiyo wajue kuwa kocha wao ana tatizo la kifamilia.

“Nataka mashabiki wajue kuwa nina tatizo na tatizo lenyewe nimeliweka wazi ili watu waweze kunielewa vizuri zaidi, ni tatizo la kiafya la mke wangu,” alisema Benchikha.

Benchikha alisema hata viongozi Simba walimuomba asiondoke lakini akaona jambo hilo limekuwa gumu na ndio maana akafikia hatua ya kuchukua maamuzi magumu ambayo yanamuumiza hata yeye.
Alisema kwamba malengo yake na Simba kwenye Ligi ya Mabingwa Afrika ilikuwa ni kufikia hatua ya nusu fainali au fainali na hata kuchukua kombe lakini hilo halikuwezekana kwa alichokiita kuwa ni mapenzi ya Mungu.
Benchikha hata hivyo alisema timu ya Al Ahly ya Misri waliyopambana nayo katika robo fainali ya ligi hiyo ni timu kubwa japo matumaini yake makubwa yalikuwa ni kuvuka hatua hiyo lakini haikuwa bahati yao,
Hatua ya Benchikha kuachana na Simba imekuja baada ya kuwapo uvumi wa muda mrefu kwamba kocha huyo angeachana na klabu hiyo na hata alipoomba ruhusa na kuondoka kwa muda mfupi kwa kilichoelezwa kuwa ni matatizo ya kifamilia uvumi ulizidi kuenea kwamba asingerudi tena.

Benchikha hata hivyo alirudi nchini na kuendelea na kazi yake na sasa ameiacha Simba ikiwa nafasi ya tatu kwenye Ligi Kuu NBC lakini pia ameiwezesha kubeba taji la Ligi ya Muungano.
Kocha huyo ameondoka na wasaidizi wake wawili, Kamal Boujnane na Farid Zamit na tayari uongozi wa Simba umemtangaza, Juma Mgunda kukaimu nafasi hiyo akisaidiwa na Suleiman Matola.
Mtihani wa kwanza wa Mgunda na Matola utakuwa ni kesho Jumanne katika mechi ya Ligi Kuu NBC dhidi ya Namungo FC itakayopigwa Ruangwa mjini Lindi kwenye Uwanja wa Majaliwa.

Na mwandishi wetu
Kocha mkuu wa Simba, Abdelhak Benchikha amewataka wachezaji wake kusahau ushindi wa mabao 6-0 walioupata dhidi ya Jwaneng Galaxy na kufuzu robo fainali ya Ligi ya Mabingwa Afrika.
Badala yake kocha huyo amewataka wachezaji hao kuhamishia akili na nguvu zao katika kuzisaka pointi 12 za michezo minne ijayo ya Ligi Kuu NBC.
Simba inakabiliwa na michezo minne inayotarajiwa kupigwa Machi 6, 9, 12 na 15, huku michezo mitatu wakicheza kwenye Uwanja wa wa Jamhuri, Morogoro na mmoja ukipigwa ugenini Mkwakwani, Tanga.
Wekundu hao kesho watashuka uwanjani kuikabili Tanzania Prisons, kisha watasafiri kuikabili Coastal Union na baadaye watarejea nyumbani kumenyana na Singida Fountain Gate FC kabla ya kumalizana na Mashujaa FC.
“Tuna ratiba ngumu mbele yetu lakini tumefanikiwa kuvuna pointi na kuonesha ubora katika michezo iliyopita, bado tuna kazi ya kufanya na sasa tunapaswa kuonesha ukubwa wetu kwenye mechi zinazofuata.

“Tumecheza vizuri sana katika michezo ya nyuma, ubora wa mechi ile (6-0) uliooneshwa na wachezaji wangu nina imani utaendelea kuonekana katika mechi zijazo na kuitumia michezo hiyo kama sehemu ya maandalizi ya mechi za robo fainali,” alisema Benchikha.

Na mwandishi wetu
Kocha mkuu wa Simba, Abdelhak Benchikha amesema kiwango kilichooneshwa na wachezaji wake kwenye ushindi wa mabao 6-0 dhidi ya Jwaneng Galaxy, kimeonesha mwanga mzuri na kumpa matumaini ya kufanya vizuri kwenye hatua ya robo fainali.
Alisema ulikuwa mchezo mzuri na anawapongeza wachezaji wake kwa kupambana na kujituma na kufanya kile ambacho amewatuma mazoezini na kufanikiwa kuingia hatua ya robo fainali ya Ligi ya Mabingwa Afrika kwa kishindo.
“Niwapongeze wachezaji wamepambana sana, mashabiki wamejitokeza kwa wingi kusapoti timu yao, tulifanya maandalizi mazuri kwa kuzingatia mambo muhimu, mbinu, ufundi, kisaikolojia kwa vijana wangu na kuwasisitiza katika kupambana.

“Wamefanya kile nilichowapa katika uwanja wa mazoezi kwa kushinda idadi kubwa ya mabao 6-0, kwangu tungeshinda bao 1-0 pia ingekuwa vizuri kwa kuwa tulihitaji kufuzu hatua nyingine,” alisema Benchikha.

Aliongeza kuwa baada ya mechi hiyo wanaenda kujipanga kwa ajili ya mechi zilizopo mbele yao zikiwemo za Ligi Kuu NBC kabla ya kufanya maandalizi ya michezo ya hatua ya robo fainali.

Na mwandishi wetu
Kocha mkuu wa Simba, Abdelhak Benchikha amesema sare ya 0-0 waliyoipata jana Ijumaa dhidi ya Asec Mimosas katika Ligi ya Mabingwa Afrika haijapunguza ari yao ya kutinga robo fainali.
Jumamosi ijayo Simba itamaliza mechi za makundi kwa kucheza na Jwaneng Galaxy, na endapo itashinda itafikisha pointi tisa na kufuzu kama mshindi wa pili kwenye Kundi B nyuma ya Asec Mimosas yenye pointi 11.
“Nawapongeza sana wachezaji wangu, walicheza kwa kujituma kuipambanaia nembo ya Simba hasa kipindi cha pili ambacho tulitengeneza nafasi nyingi lakini tulishindwa kufunga lakini hiyo haijatukatisha tamaa, imetuongezea ari ya kupambana kutinga robo fainali,” alisema Benchikha.
Alisema uwezo huo wanao na hiyo ni kutokana na mchezo huo kuchezwa nyumbani Uwanja wa Mkapa, Dar es Salaam ambapo watakuwa mbele ya mashabiki zao.
Kocha Mkuu wa Asec, Juliet Chevalier alisema: “Simba walitupa presha, mara kadhaa walikaribia kufunga lakini naipongeza safu yangu ya ulinzi, ilifanya kazi nzuri kiujumla na mchezo ulikuwa mzuri lakini malengo yetu ilikuwa ni kushinda mchezo huu ili kutengeneza rekodi nzuri kwetu,” alisema Chevalier.

Na mwandishi wetu
Kocha Mkuu wa Simba SC, Abdelhak Benchikha amewaomba mashabiki wa timu hiyo kuwapa muda wachezaji wapya waliowasajili kwenye dirisha dogo wakiwemo washambuliaji Pa Omar Jobe na Freddy Michael Kouablan.
Jobe na Kouablan wamejiunga na miamba hiyo ya soka kuziba nafasi ya Jean Baleke na Moses Phiri na juzi walianza kwenye mchezo wa Kombe la Shirikisho la Azam (ASFC) FA na kuonesha kiwango cha wastani.
Kocha huyo alisema wachezaji hao wana uwezo mkubwa wa kucheza na kufunga lakini wanahitaji kuzoeana na wenzao kabla ya kufanya kile ambacho mashabiki wanatarajia kukiona kutoka kwao.
“Ni wachezaji wa daraja la juu ndio maana nikapendekeza wasajiliwe, naamini wataifanyia Simba kitu kikubwa katika mashindano yote tunayoshiriki, kitu cha msingi ni vyema mashabiki wakawapa muda ili waweze kuzoea mazingira,” alisema Benchikha.
Kocha huyo raia wa Algeria alisema kutokana na malengo waliyonayo ya kufanya vizuri katika mashindano mbalimbali wanayoshiriki atahakikisha anawafua wachezaji hao na kuendana na mifumo ya timu haraka iwezekanavyo.
Benchikha PIA amepongeza uwezo uliooneshwa na wachezaji wapya wazawa waliosajiliwa dirisha dogo wakiwemo Ladack Chasambi, Edwin Balau na Salehe Karabaka na kueleza kuwa wanatoa upinzani mkubwa kutokana na ubora na kasi waliyonayo uwanjani.

Na mwandishi wetu
Kocha mkuu wa Simba, Abdelhak Benchikha, amesema lengo lake ni kufanya vizuri na kushinda mataji akiwa na Wekundu wa Msimbazi ndio maana wamerejea kambini mapema kuanza maandalizi yao.
Benchikha alisema hayo Jumamosi hii baada ya kikosi chake kurejea kwenye uwanja wa mazoezi na kuanza maandalizi ya michezo ijayo ya Ligi Kuu NBC.
Simba imerejea kambini wiki chache tangu wapoteze mchezo wa fainali wa Kombe la Mapinduzi walipokubali kichapo cha bao 1-0 dhidi ya Mlandege.
“Tumerudi kwenye uwanja wa mazoezi na haya ni mazoezi yetu ya kwanza tukiwa na wachezaji wapya ambao wameungana na timu kwenye dirisha dogo .

“Tuliingia kambini tumeanza mazoezi ya uwanjani juzi na kuanza programu yetu, wachezaji walioko kambini wapo kwenye hali nzuri, niko hapa kwa miezi sita sasa na nataka kushinda mataji nikiwa hapa, nina furaha kuwa Tanzania, niko tayari kuanza kazi yangu,” alisema Benchikha raia wa Algeria.

Na mwandishi wetu
Kocha mkuu wa Simba, Abdelhak Benchikha ameuagiza uongozi wa timu hiyo kumtafutia mshambuliaji mwenye uwezo wa kufunga mabao na kufanikisha lengo la kucheza nusu fainali ya Ligi ya Mabingwa Afrika na kunyakua ubingwa wa Ligi Kuu NBC msimu huu.
Inadaiwa kuwa kocha huyo hajaridhishwa na viwango vya washambuliaji Moses Phiri na Jean Baleke ndio sababu ya kuuagiza uongozi wa timu hiyo kuharakisha mchakato wa kumpata mshambuliaji mpya.
Kocha huyo alisema ana orodha ya washambuliaji wengi wenye uwezo wa kuisaidia timu hiyo kufika hatua hiyo kitu cha msingi ni kutoa ruhusa aanze mchakato kabla dirisha la usajili halijafungwa.

“Washambuliaji tulionao ni wazuri kwenye mashindano ya ndani lakini kutokana na malengo tuliyonayo kwenye Ligi ya Mabingwa, tunahitaji mtu ‘katili’ kutufikisha nusu fainali, tazama tulivyopata tabu kwenye Kombe la Mapinduzi,” alisema Benchikha.

Benchikha alisema tangu atue Simba, anafurahishwa namna uongozi unavyomsikiliza na kuyafanyia kazi mapendekezo yake, hivyo hata suala la mshambuliaji anaamini watalipa uzito sababu lengo lake ni kuona linakamilika kwa wakati.
Alisema kwa timu yenye kutaka mafanikio hasa kubeba ubingwa wa Afrika, huwa haijifikirii kutoa kiasi kikubwa cha pesa kununua mchezaji mzuri na kwa Simba wanatakiwa kufanya hivyo ili kufikia walipo Wydad AC, Al Ahly na timu nyingine zenye mafanikio Afrika.
Simba ipo nafasi ya pili kwenye Kundi B Ligi ya Mabingwa, wakifunga mabao matatu jambo ambalo kocha huyo alisema halimpendezi ukizingatia kundi hilo timu zimeachana kwa idadi ndogo ya pointi hivyo mabao yanaweza kutoa maamuzi. .

Na mwandishi wetu
Kocha mkuu wa Simba, Abdelhak Benchikha amesema ugeni wake Tanzania imekuwa chanzo cha timu hiyo kupata matokeo kwa tabu kwenye mechi za Ligi Kuu NBC.
Benchikha alisema hiyo ni kutokana na kutojua vizuri mifumo ambayo inatumiwa na timu zinazoshiriki Ligi Kuu NBC, hivyo kujikuta wanatumia nguvu nyingi kupata ushindi.
“Kama ningekuwa hapa (Tanzania) miezi mitatu au sita iliyopita, hili lisingekuwepo sababu ningejua mifumo inayotumiwa na timu zote lakini kwa sasa ni ngumu ndio maana mara nyingi tunakitumia kipindi cha kwanza kuwasoma wapinzani,” alisema Benchikha.
Alisema pamoja na hivyo lakini anafurahi kuona vijana wake wanashika kwa haraka anachowaelekeza mazoezini na ndio maana wanapata ushindi.
Alisema anachokifanya kwa sasa ni kufundisha vitu viwili kwa wakati mmoja, kwanza kusoma mbinu za wapinzani na pili kuwapa wachezaji wake mbinu mbadala zitakazowapa ushindi.
Benchikha pia alisema kwa kipindi kifupi ambacho amekuwa Tanzania, ameshuhudia timu nyingi zikionesha uwezo mkubwa na hiyo inatokana na taifa hili kuwa na vijana wengi wenye vipaji vya kucheza soka.
Benchikha aliyetua Simba akitokea USM Alger ndio kocha ghali zaidi Tanzania anayeshikilia rekodi ya kubeba makombe mawili ya Caf, ambayo ni Kombe la Shirikisho Afrika na Super Cup msimu uliopita.

Na mwandishi wetu
Licha ya kupata ushindi wa mabao 3-1 dhidi ya JKU kwenye Uwanja wa Amaan, Zanzibar, kocha mkuu wa Simba Abdelhak Benchikha amesema hajaridhishwa na kiwango kilichoonyeshwa na safu yake ya ulinzi.
Ushindi huo wa jana Jumatatu umeifanya Simba kufikisha pointi tatu na kushika nafasi ya pili kwenye kundi B nyuma ya vinara Singida Fountain Gate wenye pointi sita ambao tayari wamefuzu robo fainali na kuungana na Mlandege na Azam FC.
Benchikha raia wa Algeria alisema ni ushindi muhimu kwao, walihitaji kuanza mashindano vizuri lakini makosa yaliyofanywa na safu yake ya ulinzi hayajamfurahisha.
“Sijaridhishwa na kiwango cha wachezaji kutokana na makosa yaliyofanywa na safu ya ulinzi, sisi ni timu kubwa yenye wachezaji wakubwa hatuwezi kufanya makosa ya namna ile.

“Tuliruhusu bao moja lakini wapinzani wetu wakapoteza nafasi nyingine mbili, tumefanya makosa kama wangekuwa makini wangetuadhibu lakini tunashukuru kwa pointi tatu tunarudi kurekebisha makosa na kujipanga na mchezo ujao,” alisema Benchikha.

Katika hatua nyingine Benchikha alisema amevutiwa na uwezo uliooneshwa na mchezaji mpya, Salehe Karabaka ambaye ameanza vyema kwa kufunga bao kwenye mchezo huo.
“Unapocheza mchezo wa kwanza na kufunga baada ya dakika mbili ni jambo zuri, nimefurahishwa naye (Karabaka) na ana kesho iliyo bora na tuko hapa kwa ajili ya kumsaidia kiufundi ili aweze kufika mbali,” alisema Benchikha.

Na mwandishi wetu
Beki wa kulia wa Simba, Israel Mwenda (pichani) amesema ujio wa kocha Abdelhak Benchikha umemfanya ajihisi amezaliwa upya kutokana na kupewa nafasi ya kucheza mara kwa mara.
Kabla ya Benchikha makocha waliopita Simba miaka ya karibuni; Pablo Franco, Zoran Maki, Juma Mgunda na Roberto Oliveira ‘Robertinho’ wote hawakumpa nafasi ya kucheza mara kwa mara.
Beki huyo alisema kwa muda mfupi ambao timu imekuwa chini ya Benchikha ameshacheza zaidi ya mechi nne na kutoa mchango mkubwa kwa timu yake hadi kuitwa kwenye kikosi cha timu ya taifa.

“Nilikuwa najiona kama mtumishi hewa, nalipwa mshahara bila kufanya kazi lakini kwa sasa nafurahi kuwepo hapa, ni miongoni mwa wachezaji ambao wanaipigania nembo ya Simba kufikia malengo yake msimu huu,” alisema Mwenda.

Beki huyo alisema habezi uwezo wa mtangulizi wake, lakini makocha waliopita hawakuwa na utaratibu mzuri wa kuwapa nafasi wachezaji wengine kutoa mchango wao kwa timu zaidi ya kutumia baadhi ya wachezaji ambao anaamini ni msaada kwake.
Alisema kuna wakati hiyo ilimkatisha tamaa na kutamani kuvunja mkataba ingawa baadhi ya watu walimshauri kurudi kundini kuendelea kupigania nafasi ya kucheza.
Mwenda alijiunga na Simba misimu mitatu iliyopita akitokea KMC, lakini alikutana na upinzani mkali kutoka kwa Shomari Kapombe ambaye amekuwa chaguo la kwanza kwa makocha wengi wanaoifundisha timu hiyo.