Roma, Italia
Mshambuliaji wa Ubelgiji, Romelu Lukaku amejiunga na klabu ya Roma ya Italia kwa mkopo akitokea Chelsea huku kukiwa na habari kwamba alikataa ofa ya kwenda kucheza soka Saudi Arabia.
Lukaku anarudi kwa mara nyingine katika Ligi ya Serie A nchini Italia baada ya kuwa na Inter Milan ambayo aliiwezesha kufikia hatua ya fainali ya Ligi ya Mabingwa Ulaya.
“Mapokezi ambayo klabu hii na mashabiki wamenipa ni mambo yaliyonivutia na inakuwa kama hamasa ya kuendelea zaidi kujitoa kwa kila hali na timu yangu mpya,” alisema Lukaku.
Habari za ndani zinadai kwamba Lukaku mwenye umri wa miaka 30 amekubali kupunguziwa mshahara ili tu apate nafasi ya kuungana na kocha Jose Mourinho ambaye ndiye anayeinoa timu hiyo kwa sasa.
Mourinho aliwahi kuwa na Lukaku katika klabu ya Chelsea msimu wa 2013-14 na mwaka 2017 kwa mara nyingine, Mourinho akiwa Man United alimsajili mchezaji huyo kwa ada ya Pauni 75 milioni kutoka klabu ya Everton.

“Nilipata fursa ya kuzungumza na mmiliki na niliguswa na shauku yao, sasa tunatakiwa kufanya kazi, tutulie na kuwa bora mechi baada ya mechi, kwa upande wangu sina cha kusubiri kabla ya kujitoa kwa ajili ya wachezaji wenzangu ndani na nje ya uwanja,” alisema Lukaku..

Mwaka 2019, Lukaku alisaini mkataba wa kudumu Inter Milan kwa ada ya Pauni 74 milioni akitokea Man United lakini mwaka 2021 alirudi Chelsea waliomsajili kwa ada ya Pauni 97.5 milioni lakini hakuwa na mafanikio na mara ya mwisho kuonekana akiiwakilisha timu hiyo ilikuwa ni Mei 2022.
Lukaku hakuwa katika mpango wa kocha mpya wa Chelsea, Mauricio Pochettino na hakusafiri na timu hiyo katika ziara za maandalizi ya msimu wa 2023-24 nchini Marekani na hilo linadaiwa kuchangia kumfanya aihame timu hiyo.

Budapest, Hungary
Sevilla jana Jumatano imeweka rekodi ya kulibeba taji la Europa Ligi kwa mara ya saba ikiilaza AS Roma kwa penalti 4-1 huku kocha wa Roma, Jose Mourinho akiitupa medali ya shaba aliyopewa.
Ushindi wa Sevilla ambao ulitokana na sare ya bao 1-1 kabla ya mikwaju ya penalti, umekuwa tukio baya kwa Mourinho ambaye alikuwa na rekodi ya kutopoteza hata mara moja mechi ya fainali Ulaya.
Mourinho ambaye tayari ana mataji matano ya Ulaya na jana alikuwa akijiandaa kubeba taji lake la sita kabla ya Sevilla kumkwaza, kitendo chake cha kuitupa medali hiyo kilishangaza wengi.
Kocha huyo wa zamani wa klabu za Chelsea, Man United, Tottenham, Real Madrid na Inter Milan, kama kawaida yake hakukosa jibu, “hivyo ndivyo nilivyofanya, siihitaji medali ya fedha (silver) kwa hiyo niliigawa.”
“Nataka kubaki Roma lakini wachezaji wangu wanahitaji zaidi, nami nahitaji zaidi, sitaki kupambana tena katika hili, nimechoka kuwa kocha, kuwa mzungumzaji, msemaji wa klabu,” alisema.
Mourinho jana alikuwa akiwania kuipuku rekodi ya kocha mkongwe Mtaliano, Giovanni Trapattoni ambaye ana rekodi ya kushinda fainali tano za Ulaya na kama angeshinda jana angekuwa na rekodi ya ushindi wa mechi sita za fainali.
Mechi ya Roma na Sevilla pia iliandamana na rekodi nyingine ya kadi 13 za njano zilizotolewa katika mechi hiyo akiwamo Mourinho ambaye naye alipewa kadi hiyo.

Mourinho ambaye imekuwa ikidaiwa kwamba yuko mbioni kuihama Roma, alikataa kuzungumza lolote kuhusu mambo yake ya baadaye ingawa bado ana mkataba na Roma utakaofikia ukomo 2024, PSG na Real Madrid zinadaiwa kumtaka.

“Mambo yangu ya baadaye? Niko makini, nimesema miezi michache iliyopita, kwamba nikiwa na mazungumzo na klabu yoyote nitawaambia wamiliki, siwezi kufanya chochote kwa siri,” alisema Mourinho.

Katika mechi hiyo, Roma ndiyo iliyokuwa ya kwanza kupata bao lililofungwa na Paolo Dybala lakini bao la kujifunga na Gianluca Mancini lilifanya matokeo yawe sare ya bao 1-1.
Kwenye mikwaju ya penalti, baada ya Roma kukosa penalti mbili, Gonzalo Montiel ambaye pia ndiye aliyeifungia Argentina bao la ushindi kwenye fainali za Kombe la Dunia, jana pia ndiye aliyeifungia Sevila bao la ushindi lililowapa taji la saba la Ulaya.

Budapest, Hungary
Kocha wa AS Roma, Jose Mourinho (pichani) amesema hajafanya mazungumzo na klabu yoyote na kitu pekee anachofikiria kwa sasa ni kuiwezesha timu hiyo kutwaa taji la Europa Ligi leo Jumatano.
Roma leo itakuwa dimbani mjini Budapest, Romania katika mechi ya fainali ya Europa Ligi dhidi ya Sevilla ya Hispania lakini Mourinho amekuwa akihusishwa na mipango ya kuondoka katika klabu hiyo.
Mourinho ana mwaka mmoja katika mkataba wake na AS Roma lakini tayari ameanza kutajwa katika klabu nyingine ikiwamo klabu yake ya zamani ya Real Madrid ili achukue nafasi ya Carlo Ancelotti ambaye zipo habari kwamba anatakiwa timu ya Taifa ya Brazil.
“Kwa hakika sijafanya mazungumzo na klabu nyingine, nafikiria kuhusu kesho (leo Jumatano) na nini tunachotaka kukifanya kwa sababu tunataka kucheza,” alisema Mourinho ambaye pia amewahi kuzinoa klabu za Chelsea, Inter Milan, FC Porto, Man United na Tottenham.
Msimu uliopita Mourinho aliiongoza vyema AS Roma na kubeba taji la michuao ya Europa Conference Ligi ambalo ni taji lake la tano katika michuano ya klabu Ulaya na leo anawania taji la sita.
Mourinho ana rekodi nzuri ya kushinda michuano ya klabu Ulaya katika hatua ya fainali lakini leo anakumbana na timu yenye rekodi ya kushinda fainali sita za mwisho za michuano hiyo ilizoshiriki.

“Historia haichezi, mwenzangu (kocha wa Sevilla Jose Mendilibar) anafikiria tofauti, namheshimu, anaamini historia inawafanya Sevilla wawe na nafasi kubwa ya kushinda, naliheshimu hilo, tupo katika fainali kwa sababu tuna sifa, wana historia ambayo sisi hatuna,” alisema.

“Kwa wao kucheza fainali ya Europa ni kitu cha kawaida, kwetu sisi ni tukio la kipekee, kwa mashabiki wao kwenda kwenye mechi ya fainali ni kama vile wanaenda kwenye mechi ya ligi, kwetu sisi ni jambo lisilo sahaulika,” alisema.
“Wachezaji wa Sevilla wana uzoefu zaidi lakini sisi tumekuwa pamoja kwa miaka miwili,” aliongeza Mourinho ambaye pia anaamini timu yake ipo tayari.

Leverkusen, Ujerumani
Kocha Jose Mourinho ana kila sababu ya kuwa na furaha baada ya AS Roma kufuzu fainali ya Europa Ligi ikiwa ni mara ya pili mfululizo kuifikisha timu hiyo hatua ya fainali ya michuano ya klabu Ulaya.
Roma jana Ahamisi ilitoka sare ya bao 0-0 na Bayer Leverkusen ya Ujerumani na hivyo kusonga mbele kwa ushindi wa bao 1-0, ushindi ambao iliupata katika mechi ya kwanza ikiwa nyumbani.
Msimu uliopita, Maurinho aliifikisha timu hiyo katika fainali ya Europa Conference Ligi na kubeba taji hilo na sasa anajiandaa kuipa timu hiyo taji jingine la pili la Ulaya yaani Europa Ligi.
Roma sasa itaumana na Sevilla katika mechi ya fainali itakayopigwa Mei 31. Sevilla imefuzu hatua hiyo baada ya kuichapa Juventus mabao 2-1 na hivyo kupata kwa ushindi wa jumla wa mabao 3-2.
Katika mechi ya nusu fainali ya kwanza, Edoardo Bove aliipatia Roma bao pekee ambalo limetosha kuwa mtaji wa kuifanya timu hiyo iweke rekodi ya kufikia hatua ya fainali ya michuano hiyo ya pili kwa ukubwa kwa ngazi ya klabu barani Ulaya.
Mourinho hapo Mei 31 atakuwa akiwania rekodi ya kushinda mechi ya sita ya fainali katika michuano ya klabu barani Ulaya akiwa tayari amefanikiwa kushinda fainali hizo mara tano, mara mbili akiwa FC Porto na nyingine alishinda akiwa, Man United, Inter Milan na AS Roma.