Greensports Site: Habari za michezo na burudani Tanzania na Ulimwenguni.

Stars yafuzu Afcon 2025.

Zaki Chatanda — Wed, 20 Nov 2024 08:09:02 +0000

Timu ya taifa ya Tanzania ‘Taifa Stars’ imefuzu kucheza fainali za Kombe la Mataifa ya Afrika (Afcon) 2025 zitakazofanyika nchini Morocco baada ya kuilaza Guinea bao 1-0.

Ushindi huo umepatikana Jumanne hii Novemba 19, 2024 katika mechi iliyochezwa kwenye Uwanja wa Mkapa, Dar es Salaam kwa bao hilo pekee lililofungwa na Simon Msuva.

Bao hilo limetosha kuifanya Stars iweke rekodi ya kufuzu fainali hizo zinazoshirikisha nchi za Mataifa ya Afrika kwa mara ya nne kuanzia mwaka 1980, 2018 na 2023.

Msuva alifunga bao hilo dakika ya 60 akimalizia pasi ya juu ya Mudathir Yahya na kuruka kabla ya kuupiga mpira wa kichwa ambao ulimshinda kipa wa Guinea, Mussa Camara ambaye pia anaidakis timu ya Simba.

Ushindi huo umeifanya Stars iliyokuwa Kundi H kufikisha pointing 10 na kushika nafasi ya pili nyuma ya vinara DR Congo wenye pointi 12 wakati Guinea wanabaki na pointi tisa na Ethiopia wamemaliza wakiwa mkiani na pointi yao moja.

Guinea ni dhahiri wameumizwa mno na matokeo hayo kwani walihitaji sare ya aina yoyote ili kufuzu lakini walijikuta pagumu kwa kipindi kirefu cha mchezo kutokana na mashambulizi ya mara kwa mara ya wachezaji wa Stats.

Stars walicheza kwa kujiamini wakikaba na kulishambulia mara kwa mara lango la Guinea ingawa timu hiyo ilikuwa na tatizo katika umaliziaji.

Msuva na Clement Mzize mara kadhaa walilisakama lango la Guinea lakini walikosa umakini katika umaliziaji na kuinyima Stars mabao kabla ya Msuva kurekebisha makosa yake na kuipa Stats ushindi.

Baada ya filimbi ya kumaliza mchezo kupulizwa na mashabiki waliofurika uwanjani kulipuka kwa shangwe, baadhi ya wachezaji wa Guinea walionekana wakimzonga mwamuzi wa mchezo huo katika namna iliyoonesha kutofurahia baadhi ya maamuzi yake.

Stars baada ya ushindi sasa inasubiri kujua itapangwa na timu gani katika Kundi lake kwa ajili ya fainali za Afcon 2025 zitakazofanyika mapema mwakani nchini Morocco.

Pep akata tamaa England

Green Sports — Tue, 12 Nov 2024 18:32:17 +0000

Manchester, England
Kocha wa Man City, Pep Guardiola inaonekana amekata tamaa ya kubeba taji la Ligi Kuu England (EPL) msimu huu baada ya kudai kwamba huenda ni wakati wa timu nyingine kubeba taji hilo.
Man City baada ya kulala kwa mabao 2-1 mbele ya Brighton, kwa sasa imeachwa kwenye msimamo wa EPL kwa tofauti ya pointi tano na vinara wa ligi hiyo, Liverpool.
Kwa mara ya kwanza katika miaka yake 17 ya ukocha kwa timu za hadhi ya juu, Pep amepoteza mechi nne mfululizo na kwa Man City inapoteza mechi nne mfululizo kwa mara ya kwanza katika kipindi cha miaka 18.
Muelekeo wa Man City msimu huu unaelekea kuvuruga rekodi nzuri ya timu hiyo kushinda mataji sita ya EPL kati ya saba yaliyopita hapo hapo wakiwa na rekodi ya kubeba mataji manne mfululizo.
Msimu huu hata hivyo unaonekana kuwa mgumu kwa timu hiyo ikiwa imepoteza mechi za ligi dhidi ya Bournemouth na Brighton na Tottenham kwenye Carabao na Sporting kwenye Ligi ya Mabingwa.

“Tunatakiwa kujaribu tena kushinda mechi zetu, kushindwa mechi nne mfululizo ni lazima tubadili mambo kwa haraka, ratiba imekuwa ngumu lakini ni suala la kushinda mechi,” alisema Pep.

Pep pia alisema kwamba huenda baada ya miaka saba ya kushinda mataji sita labda kuna timu ina haki ya kubeba taji hilo kwa mwaka mmoja.
Man City kwa upande mwingine inakabiliwa na tatizo kubwa la wachezaji majeruhi wakiwamo Ruben Dias, John Stones, Jeremy Doku na Jack Grealish pamoja na majeruhi wa siku nyingi Rodri na Oscar Bobb.
Majanga hayo ya wachezaji majeruhi yamemfanya Pep ampe nafasi kwa mara ya kwanza katika mechi ya EPL katika nafasi ya ulinzi, nyota wake wa miaka 19, Jahmal Simpson-Pusey.

Vipigo vyazua mihemko Yanga

Green Sports — Tue, 12 Nov 2024 18:26:01 +0000

Na Hassan Kingu
Yanga hadi sasa hawajaamini kama wamefungwa bao 1-0 na Azam FC, hawajaamini na hawataki kukubali kwamba mbali na Azam pia wamefungwa mabao 3-1 na Tabora United
Kilichowakuta wanaona kama si hadhi yao, wao si wa kufungwa na sasa wameanza kusaka mchawi kwa staili ya mihemko, wakati huo huo mahasimu wao Simba wakiendelea kuwananga kwa kila namna.
Mmoja wa wahanga ambaye amekuwa mjadala katika mihemko hiyo ni kocha Miguel Gamondi ambaye jina lake la Master Gamondi limeanza kuonekana si lolote mbele ya baadhi ya mashabiki wa Yanga.
Wapo mashabiki ambao wanaamini vipigo hivyo viwili vinatosha kuwa sababu ya timu hiyo kuachana na Gamondi na kusaka kocha mwingine.
Katika hilo tayari kocha kutoka nchini Algeria ameanza kutajwa na hata picha zake kutawanywa kwenye mitandao ya kijamii na vyanzo mbalimbali vya habari.
Ni baada ya vipigo hivyo ndipo tumeanza kusikia habari kwamba Gamondi haambiliki, ni baada ya vipigo hivyo tumeanza kusikia kuwa uwezo wa kocha huyo ni mdogo, vipigo pia vimemfanya aanze kulinganishwa na kutofautishwa na mtangulizi wake Nasreddine Nabi.
Gamondi ambaye jana aliimbwa na kupambwa kwa kila namna leo hali imekuwa tofauti, mechi mbili zimempa sura tofauti kabisa na sura aliyokuwa nayo jana.
Utajiri au uwezo wa kifedha wa Yanga nao unazidi kuzidisha mtazamo mbaya kuhusu Gamondi kwamba ana wachezaji wazuri na hivyo timu yake inapaswa kuishinda kila timu inayocheza nayo.
Hoja kuhusu matatizo yanayowakabili wachezaji wa kikosi cha kwanza wa timu hiyo ni kama vile zinaonekana si lolote si chochote badala yake tatizo ni uwezo wa kocha kuwatumia wachezaji waliopo kwa kuwa nao uwezo wao ni wa juu.
Kuumia kwa mabeki tegemeo wa timu hiyo, Shadrack Boka anayecheza upande wa kushoto na Yao Kouasi anayecheza upande wa kulia kumeiathiri Yanga lakini wako mashabiki ambao wanaamini hiyo haitoshi kuwa sababu ya timu yao kufungwa.
Kupewa kadi nyekundu na kukosekana kwa beki mwingine tegemeo wa kati, Ibra Bacca nako pia hakutoshi kuwafanya baadhi ya mashabiki kuamini kwamba hilo ni tatizo linaloifanya timu yao isipate matokeo mazuri.
Mashabiki hawa kwao tatizo la kupoteza mechi mbili ni la kiufundi na mhanga kwao ni Gamondi, anatakiwa aondoke na nafasi yake apewe kocha mwingine.
Ukiachana na Gamondi, mhanga mwingine ambaye ameanza kulalamikiwa ni wachezaji, hawa wanadaiwa kuanza kushuka viwango au kutocheza katika ubora wao.
Mhanga mmojawapo mkuu katika hilo ni Stephane Aziz Ki ambaye ukame wake wa mabao msimu huu umeanza kulalamikiwa hasa baada ya vipigo hivyo viwili.
Mengi ya Aziz Ki yameanza kuzungumzwa, wapo ambao wamekuwa akirusha mitandaoni picha za mchezaji huyo katika maisha yake binafsi akiwa maeneo ya starehe na kuzihusisha moja kwa moja na kushuka kwake kiwango.
Wengine wanakwenda mbali zaidi na kutaja jina la mtu ambaye wanaamini ndiye anayemkwaza mchezaji huyo asifunge au akose penalti au ubora wake ushuke (kama kweli umeshuka).
Kuna ambao ukiwasikiliza utadhani ni mashuhuda wa mchezaji huyo katika maisha yake ya kila siku ya nje ya uwanja, wanajua anaishi wapi na anafanya nini na anafanya na nani. Hoja za kiufundi zinazotolewa kwamba baadhi ya mabeki wameshamjulia Aziz Ki zinaonekana kutokubalika, badala yake mchezaji huyo anatakiwa afunge asipofanya hivyo sababu ya haraka inayotolewa ni kwamba ameshuka kiwango.
Ukweli ni kwamba taharuki iliyoibuka sasa ikipewa nafasi wakati huu ligi bado mbichi inaweza kuivuruga Yanga kuliko ilivyo sasa.
Hoja zote zinazotolewa na mashabiki kama hazitafanyiwa tathmini ya uhakika zinaweza kuwa mtaji mzuri wa mahasimu wa Yanga kuivuruga timu zaidi ya hiki kinachoonekana kwa sasa.
Upo uwezekano mkubwa kwamba hoja za kumsakama Gamondi na wachezaji wa Yanga zinatoka upande wa pili na kutumiwa ili kuitoa Yanga kwenye mstari na kibaya zaidi ni kwamba Yanga wenyewe wameingia katika mtego wa taarifa zisizo rasmi na kuziamini.
Taarifa hizo zisizo rasmi ni kama vile kikao kizito kimefanyika na maamuzi yamefanyika, Gamondi hana muda mrefu wa kuinoa Yanga.
Habari hizi za upande mmoja kutumia udhaifu wa upande wa pili kama jiwe ni utamaduni wa muda mrefu baina ya timu hizi.
Kilichopo ni kwamba Yanga hii ni timu nzuri, na japo vipigo vinashtua lakini uongozi usikubali taharuki na mihemko iliyoibuka iwe sababu ya kuivuruga timu yao.
Inaweza kuonekana jambo la kawaida na rahisi kumuondoa Gamondi na kuja na kocha mpya lakini huyo kocha mpya ajaye kazi yake inaweza kuwa ngumu na kumfanya ahitaji muda mrefu wa kupata timu ya ushindi.

Bellingham: Tatizo majukumu mapya

Abdul Mohammed — Tue, 12 Nov 2024 18:00:17 +0000

Madrid, Hispania
Kiungo wa Real Madrid, Jude Bellingham amelalamikia mabadiliko ya majukumu kuwa ndiyo yaliyomsababishia ukame wa mabao tangu kuanza kwa msimu huu.
Bellingham ambaye pia ni kiungo wa timu ya taifa ya England ametoa kauli hiyo baada ya kufunga bao lake la kwanza msimu huu Jumamosi hii timu yake ikiichapa Osasuna mabao 4-0 katika La Liga.
Katika mechi hiyo iliyopigwa kwenye dimba la Bernabeu, bao la Bellingham lilipatikana dakika ya 42 wakati mabao mengine matatu ya timu hiyo yakifungwa na Vinicius Jr.
Kabla ya bao hilo, Bellingham aliifungia Real Madrid mara ya mwisho mwishoni mwa msimu uliopita wa 2023-24, msimu ambao mchezaji huyo aliumaliza akiwa amefunga mabao 19.
“Najiona ni mwenye kufanya yale yale ninayoyafanya, lakini tofauti pekee ni kwamba nimefunga goli, watu wengi wamekuwa wakizungumzia hilo kwa sababu mwaka jana nilifunga magoli mengi lakini nafikiri sasa nacheza katika majukumu tofauti,” alisema Bellingham.
Bellingham alifafanua kuwa kwa sasa anafanya majukumu tofauti katika sehemu tofauti ya uwanja na kwamba atafanya lolote kwa ajili ya timu.
Mashabiki wa Real Madrid wameendelea kumuunga mkono mchezaji huyo licha ya ukame wa mabao na hata alipotolewa dakika ya 75 walisimama na kumpa heshima yake.

“Bado najiona kama mimi ni mtu wa kipekee katika dunia hii kwa kuichezea hii klabu, hata katika wakati mgumu bado nashukuru kwa kuwa hapa, kutoka nje na kupewa heshima, hilo najivunia,” alisema Bellingham.

Bellingham pia alimpongeza mchezaji mwenzake Vinícius ambaye mabao yake matatu aliyofunga yamemfanya afikishe mabao manane hadi sasa baada ya kucheza mechi 12 za La Liga msimu huu.

Azam yaipiga Yanga 1-0

Green Sports — Sat, 02 Nov 2024 19:55:45 +0000

Na mwandishi wetu
Yanga leo Jumamosi Novemba 2, 2024 imepoteza kwa mara ya kwanza mechi ya Ligi Kuu NBC msimu wa 2024-25 baada ya kulala kwa bao 1-0 mbele ya Azam FC.
Bao hilo pekee katika mechi hiyo iliyochezwa kwenye dimba la Azam Complex, Chamazi, Dar es Salaam, lilifungwa na Gibril Sillah dakika ya 33 akiitumia vizuri pasi ya Adolf Mtasingwa.
Dalili za ushindi kwa Azam zilianza kuonekana dakika ya nane ya mchezo baada ya Paschal Msindo kuitoka safu ya ulinzi ya Yanga na wakati akimkaribia kipa Djigui Diarra aliangushwa chini na Mudathir Yahya.

Tukio hilo liliibua malalamiko kwa wachezaji wa Azam ambao walikuwa wakimlalamikia mwamuzi Ahmed Arajiga kwa imani kwamba alipaswa kuwapa penalti.
Kasi ya Azam iliwaweka Yanga pabaya dakika 10 kabla ya kuingia kwa bao hilo pekee baada ya beki wao wa kati tegemeo, Ibra Bacca kulazimika kumvuta shati Nassor Saaduni aliyemtoka kwa kasi akielekea kukutana na kipa Diarra.
Kwa tukio hilo, Bacca alipewa kadi nyekundu hapo hapo hali ambayo ilizidi kuibua hofu kuhusu hatma ya Yanga kwenye mechi hiyo baada ya kubaki na wachezaji 10 uwanjani.
Yanga nayo mara kadhaa ililichachafya lango la Azam, dakika ya 17, Maxi Nzengeli alimpa Clatous Chama pasi ndefu ambayo aliituliza vizuri na mpira kumsogezea Stephane Aziz Ki ambaye hata hivyo shuti lake halikuwa na madhara.
Dakika ya 88, Yanga ilifanya shambulizi jingine kali kwa mpira ulioanzia kwa Clement Mzize ambaye baada ya kuwazidi ujanja mabeki wa Azam akapiga krosi iliyomkuta Nickson Kibabage ambaye hata hivyo shuti alilopiga lilitoka nje.
Azam baada ya kuwa mbele walianza ujanja wa kuchelewesha muda hali ambayo ilimlazimu mwamuzi wa mchezo huo kumpa kadi ya njano kipa wa timu hiyo, Mohamed Mustapha.
Katika kusaka bao la kusawazisha, kocha wa Yanga Miguel Gamondi alimtoa Chama akaingia Duke Abuya na baadaye akamuingiza Kibabage na kumtoa Shedrack Boka na Prince Dube akatoka nafasi yake akaingia Clement Mzize.
Kocha huyo aliendelea kufanya mabadiliko kwa kumtoa Aziz Ki na nafasi yake kuingia Pacome Zouzoua na Mudathir nafasi yake akaingia Kennedy Musonda mabadiliko ambayo hayakubadili matokeo ya mchezo.
Kwa upande wa Azam walitoka Sillah na Msindo na kuingia Frank Tiesse na Sidibe na baadaye wakatoka Fei Toto na Yeison Fuentes na kuingia Ever Mezer na Yanick Bangala.
Yanga pamoja na kipigo hicho bado inaongoza ligi ikiwa na pointi 24 sawa na Singida BS ambayo nayo leo hii inaumana na Coastal Union japo matokeo ya mechi hiyo yanaweza kuitoa Yanga kileleni.

Ten Hag awashukuru mashabiki

Green Sports — Sat, 02 Nov 2024 16:20:44 +0000

Manchester, England
Kocha Erik ten Hag aliyetimuliwa katika kikosi cha Man United, ameibuka kwa mara ya kwanza tangu kutimuliwa kwake na kuwashukuru mashabiki kwa namna walivyomuunga mkono.
Ten Hag alitimuliwa Jumatatu iliyopita wakati timu hiyo ikishika nafasi ya 14 kwenye Ligi Kuu England (EPL) ikiwa na rekodi isiyovutia ya kupoteza mechi nne kati ya tisa za mwanzo za ligi hiyo msimu huu wa 2024-25.
Nafasi ya Ten Hag imechukuliwa na kocha kutoka Ureno, Rúben Amorim ambaye hapo kabla alikuwa akiinoa Sporting Lisbon na anatarajia kuanza rasmi kazi hiyo mpya Novemba 11 mwaka huu.
“Nianze kwa kuwashukuru, asanteni kwa wakati wote kuwa karibu na klabu, iwe kwa mechi ya nyumbani au ugenini au mechi ngumu kwenye dimba la Old Trafford, hamkuwahi kuyumba katika kutuunga mkono,” alisema Ten Hag.
Kocha huyo pia aliwashukuru maofisa wa klabu hiyo katika kila idara mbalimbali kwa namna ambavyo walikuwa naye pamoja katika wakati mzuri na hata alipokuwa katika kipindi kigumu.

“Tumeshinda mataji mawili, mafanikio ambayo yataendelea kunifariji katika maisha yangu yote, ni kweli kwamba ndoto zangu zilikuwa ni kuipa klabu hii mataji mengi, bahati mbaya ndoto hiyo haikutimia,” alisema Ten Hag.

Man United ilitangaza rasmi jana Ijumaa uamuzi wa kumkabidhi Amorim majukumu ya Ten Hag ambapo kocha huyo mpya amesaini mkataba utakaofikia ukomo Juni 2027 kukiwa na kipengele kinachotoa nafasi ya kuongeza mwaka mmoja zaidi.

Bao la jioni laiokoa Simba

Green Sports — Sat, 02 Nov 2024 10:16:53 +0000

Na mwandishi wetu
Simba imenyakua pointi tatu muhimu ikineemeka na bao pekee la jioni dhidi ya Mashujaa katika mechi ya Ligi Kuu NBC iliyopigwa leo Ijumaa kwenye Uwanja wa Lake Tanganyika, Kigoma.
Bao hilo pekee lilipatikana dakika ya sita katika dakika za nyongeza baada ya dakika 90 za kawaida kumalizika mfungaji akiwa Lionel Ateba kwa kichwa kufuatia kona iliyochongwa na Awesu Awesu.
Muda mfupi baada ya kuingia bao hilo mwamuzi alipuliza filimbi ya kumaliza mchezo na hapo hapo akajikuta akizongwa na wachezaji wa Mashujaa waliokuwa wakimlalamikia kwa kuchelewa kumaliza mchezo.
Simba sasa imechupa hadi nafasi ya pili ikiwa imefikisha jumla ya pointi 22 ikiwa imefungana pointi na Singida BS lakini zikidiana wastani wa mabao wakati Yanga wakiwa kileleni na pointi zao 24.
Katika mechi yao ya leo, Simba ndio waliokuwa wa kwanza kulisakama lango la Mashujaa katika dakika ya kwanza tu ya mchezo huo baada ya Mohamed Hussein ‘Zimbwe Jr’ kupanda na mpira mbele.
Zimbwe Jr mara baada ya kupanda mpira huo alimuunganishia Lionel Ateba ambaye hata hivyo shuti lake lilipaa juu ya lango.
Dakika ya 41 Simba walifanya shambulizi jingine safari hii Ateba alimuunganishia pasi Kibu Denis ambaye akiwa katika eneo zuri aliumiki mpira vibaya na kuwahiwa na kipa wa Mashujaa, Eric Johola.
Mashujaa nao mara kadhaa walionekana kulisakama lango la Simba hususan mshambuliaji wake Ismail Mgunda akishirikiana na Seif Abdallah Karie ambao juhudi zao zilikwamishwa na ukuta wa Simba ukiongozwa na kipa Musa Camara.
Ligi hiyo itaendelea Jumamosi kwa mechi kati ya Yanga na Azam kwenye Uwanja wa Azam Complex wakati Singida BS itaumana na Coastal Union kwenye Uwanja wa New Amaan, Zanzibar.

Amorim kocha mkuu Man United

Green Sports — Sat, 02 Nov 2024 09:29:24 +0000

Manchester, England
Klabu ya Manchester United hatimaye imemteua Ruben Amorim (pichani) kuwa kocha mkuu mpya wa timu hiyo akichukua nafasi iliyoachwa na Erik ten Hag aliyetimuliwa.
Amorim mwenye umri wa miaka 39 ambaye anatokea Sporting Lisbon ya Ureno, amesaini mkataba unaofikia ukomo Juni 2027 na anatarajia kutua rasmi Old Trafford yalipo makazi ya Man United Novemba 11.
Kwa mantiki hiyo kocha wa muda, Ruud van Nistelrooy aliyekabidhiwa majukumu mara baada ya kutimuliwa kwa Ten Hag Jumatatu iliyopita, ataendelea kufanya kazi hiyo kwa mechi tatu zijazo.
Tetesi kuhusu Amorim zilianza kusikika katika siku za karibuni ambapo kocha mwingine ambaye jina lake pia lilikuwa likitajwa mara kadhaa ni Xavi Hernandez aliyekuwa akiinoa Barcelona.
Amorim anakuwa kocha wa sita wa kudumu wa Man United tangu kuondoka kwa Sir Alex Ferguson, kocha ambaye aliinoa klabu hiyo kwa mafanikio kwa kipindi cha miaka 26 kabla ya kung’atuka mwaka 2013.
Sporting walithibitisha Amorim kwenda Man United na kubainisha kwamba klabu hiyo ilikubali kuuvunja mkataba wa sasa wa Amorim na kutoa kiasi cha fedha kama sehemu ya makubaliano hayo.
Amorim anatajwa kuwa mmoja wa makocha wenye umri mdogo ambaye ameanza kuheshimika katika soka Ulaya, mtihani wake wa kwanza katika Ligi Kuu England akiwa kwenye benchi la Man United utakuwa Novemba 24 dhidi ya Ipswich Town.

Yanga yashika usukani ligi kuu

Green Sports — Wed, 30 Oct 2024 20:34:13 +0000

Na mwandishi wetu
Yanga imefanikiwa kuushika usukani wa Ligi Kuu NBC msimu huu kwa mara ya kwanza baada ya kuichapa Singida BS bao 1-0 katika mechi iliyochezwa leo Jumatano kwenye Uwanja wa New Amaan, Zanzibar.
Kwa ushindi huo Yanga ambao ni mabingwa watetezi wa ligi hiyo wamefikisha pointi 24 na kuwazidi Singida BS kwa pointi mbili ingawa Singida imecheza mechi tisa wakati Yanga hadi sasa imecheza mechi nane.
Bao hilo pekee la Pacome lilipatikana katika dakika ya 67 baada ya mchezaji huyo kufumua shuti kali la mguu wa kushoto lililompita kipa wa Singida BS, Metacha Mnata.
Metacha ambaye aliwahi kuichezea Yanga, licha ya kufungwa bao hilo lakini mara kadhaa alikuwa mwiba kwa safu ya ushambulizi ya Yanga na haikushangaza Yanga kupata bao hilo pekee licha ya mashambulizi kadhaa waliyoyafanya.
Yanga ilipata pigo la mapema baada ya beki wake wa kushoto mwenye uwezo mkubwa wa kupanda kupeleka mashambulizi, Shedrack Boka kuumia dakika ya saba na baadaye kutolewa dakika ya 17 na nafasi yake kuingia Nickson Kibabage.
Kibabage hakuwangusha Yanga, dakika ya 31, aliambaa vyema na mpira akitokea upande wa kushoto wa timu yake na kumpa pasi ya chinichini Aziz Ki ambaye shuti lake liligonga mwamba kabla ya kuokolewa na Metacha.
Singida BS walijibu shambulizi hilo dakika 10 baadaye kwa kufanya shambulizi lililotokana na mpira wa kurushwa ambao D Camara aliuunganisha kwa kichwa na Elvis Rupia naye akapiga tena kwa kichwa na mpira kutoka sentimita chache juu ya lango la Yanga.
Yanga walifanya shambulizi tena dakika ya 61, Clatous Chama alimpasia mpira Aziz Ki ambaye alipiga shuti la juu na Metacha kuonesha umahiri wake kwa kuufuata mpira huo juu na kuutoa kona ambayo haikuzaa matunda.
Mambo yaliendelea kuwaharibikia Yanga ambao walilazimika kumtoa Kibabage na nafasi yake kuingia Ibrahim Bacca baada ya Kibabage kuumia.

Rodri ambwaga Vinicius Ballon d’Or

Green Sports — Wed, 30 Oct 2024 20:24:32 +0000

Paris, Ufaransa
Kiungo wa Man City na timu ya taifa ya Hispania, Rodri ameibuka kinara wa tuzo ya Ballon d’Or 2024 akimbwaga mshambuliaji wa Real Madrid na timu ya taifa ya Brazil, Vinicius Junior.
Rodri na Vinicius ni miongoni mwa majina yaliyochomoza na kutajwa zaidi na wachambuzi wa soka kwamba mmoja wao angeibuka kinara wa tuzo hiyo iliyotolewa usiku wa kuamkia leo Jumanne.
Sambamba na wawili hao jina jingine ambalo lilionekana kutajwa mara kadhaa ni la mshambuliaji mwingine wa Real Madrid na timu ya taifa ya England, Jude Bellingham.
Baada ya Rodri kutangazwa mshindi waliofuata baada yake ni Vinicius na Bellingham huku Rodri akibebwa na mafanikio yake Man City waliobeba taji la Ligi Kuu England na Hispania alikobeba taji la Ulaya maarufu Euro 2024.
Inadaiwa Real Madrid haikuwakilishwa katika tuzo hizo baada ya kubaini kwamba Vinicius aliyepewa nafasi kubwa hakuwa kinara wa tuzo hiyo.
Awali akizungumzia kitendo cha Real Madrid kutowakilishwa kwenye tuzo hiyo, kocha wa Man City, Pep Guardiola ambaye kama ilivyo Rodri naye anatokea Hispania alisema yote ni sawa.
“Kama Real Madrid watataka kwenda sawa, kama hawatataka pia sawa, kama watataka kutoa pongezi sawa kama hawatataka kutoa pongezi pia hilo ni sawa,” alisema Pep.
Pep alifafanua kwamba unapokuwa wa pili au wa tatu katika tuzo hizo maana yake ni kwamba umefanya kitu cha kipekee, maana yake ni kwamba umekuwa na mwaka mzuri na unatakiwa uridhike.
Rodri ni mchezaji wa kwanza wa Man City kushinda tuzo ya Ballon d’Or na ni mchezaji wa kwanza wa Ligi Kuu England kushinda tuzo hiyo tangu Cristiano Ronaldo ashinde tuzo hiyo mwaka 2008.