Simba yainyuka Constantine 2-0, yashika usukani Kundi A

Na mwandishi wetu
Simba imemaliza kibingwa hatua ya makundi ya Kombe la Shirikisho Afrika leo Jumapili Januari 19, 2025 kwa kuinyuka CS Constantine ya Algeria mabao 2-0 na kushika usukani Kundi A.
Kwa ushindi huo Simba imemaliza mechi za kundi lake ikikusanya jumla ya pointi 13 wakati Constantine imeshika nafasi ya pili ikiwa na pointi 12 na zote zimefuzu robo fainali.
Timu nyingine katika kundi hilo ni Bravos du Maquis ya Angola ambayo imeshika nafasi ya tatu na CS Sfaxien ya Tunisia imeburuza mkia na zote hizo zimeaga rasmi michuano hiyo.
Ikicheza bila ya mashabiki kwenye Uwanja wa Mkapa jijini Dar es Salaam baada ya kufungiwa na Shirikisho la Soka Afrika (CAF), Simba iliandika bao lake la kwanza dakika ya 61 mfungaji akiwa Kibu Denis.
Kibu alifunga bao hilo baada ya kuinasa pasi ya Elly Mpanzu na kufumua shuti la mguu wa kulia na mpira kumshinda kipa wa Constantine, Zakaria Bouhalfaya ambaye aliishia kuwalaumu mabeki wake.
Constantine ambao katika mechi iliyopita waliifunga Simba mabao 2-1, baada ya kuingia bao hilo walifanya mabadiliko ya wachezaji watatu na mara moja wakaanza kupeleka mashambulizi langoni mwa Simba baada ya awali kucheza kwa kujihami zaidi wakihitaji sare ambayo ingewafanya washike usukani katika kundi hilo.
Mambo hata hivyo yaliwaharibikia zaidi Constantine kwani dakika ya 79, Simba waliandika bao la pili mfungaji akiwa Leonel Ateba akiitumia vizuri krosi ya Shomari Kapombe.
Kasi ya Simba hasa kipindi cha pili iliongezeka na kama si kukosa umakini wangeweza kutoka uwanjani na mabao matano kwa namna ambavyo walitengeneza nafasi nyingi na kushindwa kuzitumia.
Mfano dakika ya 55, Mpanzu aliinasa vizuri pasi ya juu ya Jean Ahoua na kuutuliza mpira kwa umaridadi lakini shuti alilopiga lilipaa kama ambavyo Kibu alipata nafasi mbili dakika za 70 na 75 lakini zote alizitumia vibaya.
Nafasi ya kwanza, Kibu akiwa karibu na lango la Constantine alifumua shuti ambalo liliokolewa na kipa na kuwa kona ambayo haikuzaa matunda wakati shuti la pili lilipaa juu ya lango.
Baada ya ushindi huo Simba sasa inasubiri kumjua mpinzani wake wa hatua ya robo fainali ambayo mechi zake zitachezwa kuanzia Machi 30 na Simba itaanzia ugenini na kumalizia nyumbani.