Na mwandishi wetu
Yanga imeichapa Prisons mabao 4-0 katika Ligi Kuu NBC huku bao moja alilofunga nyota wa mechi hiyo, Ibrahim Bacca likiwa mjadala baada ya picha kumuonesha akifunga kwa mkono.
Katika mechi hiyo iliyopigwa leo Jumapili kwenye Uwanja wa KMC, Dar es Salaam, Bacca alifunga mabao mawili wakati mawili mengine yakifungwa na Clement Mzize na Prince Dube.
Bao linalojadiliwa na mashabiki hasa mitandaoni lilipatikana dakika ya 83 ya mchezo huo lilitokana na kona ya Pacome Zouazoa ambapo Bacca aliruka juu na kuujaza mpira wavuni.
Baadaye picha za marejeo zilimuonesha namna beki huyo alivyoruka akiwa karibu na kipa wa Prisons, Sebusebu Samson lakini kichwa cha Bacca kilikuwa mbali na mpira huo huku mkono ukiwa umetangulia.
Bacca ambaye tayari alikuwa na kadi ya njano aliyopewa dakika ya 57 kwa kumchezea rafu Beno Ngassa, mwamuzi angeweza kumpa kadi ya pili ya njano na kuwa nyekundu kwa kosa la kuunawa mpira kwa makusudi.
Wachezaji wa Prisons waliokuwa eneo hilo walionekana kuduwaa wakati wenzao wa Yanga wakishangilia na kumpongeza Bacca ambaye ndiye aliyetajwa kuwa nyota au mchezaji bora wa mechi hiyo.
Yanga waliandika bao lao la kwanza dakika ya 12 mfungaji akiwa Clement Mzize, bao ambalo lilitokana na juhudi za Mudathir Yahya kuutumia vyema uzembe wa mabeki wa Prisons kwa kuuwahi mpira na kuanzisha shambulizi.
Dakika tatu kabla ya timu kwenda mapumziko, Yanga waliongeza bao la pili lililofungwa na Bacca, bao lililotokana na mpira wa adhabu uliopigwa na Aziz Ki na kugonga mwamba wa juu kabla ya kurudi na kuwahiwa na mfungaji.
Ikiwa imebaki dakika moja kabla ya timu kwenda mapumziko, Prisons walitandikwa bao la tatu lililofungwa na Dube akiitumia pasi ya Aziz Ki baada ya mabeki wa Prisons kuzembea kutumia mpira ambao ulikuwa kwenye himaya yao.
Katika kujiimarisha Prisons ilifanya mabadiliko dakika saba baada ya kuanza kipindi cha pili ikiwatoa Chanongo na nafasi yake kuingia Lambart Sabiyaka na Tariq Abdallah ambaye nafasi yake aliingia Dotto Shaaban.
Yanga ambao ushindi huo umewafanya wafikishe pointi 33 na kushika nafasi ya pili, nao walifanya mabadiliko kwa fujo wakiwatoa Khalid Aucho na kumuingiza Duke Abuya, Farid Mussa na nafasi yake kuingia Pacome na baadaye walitolewa Dickson Job na Aziz Ki na nafasi zao kuingia Shedrack Boka na Shekhan Ibrahim.
