Yanga yaikandika Dodoma Jiji 4-0

Na mwandishi wetu
Yanga imeendelea kuifukuzia Simba kileleni mwa msimamo wa Ligi Kuu NBC baada ya kuikandika Dodoma Jiji mabao 4-0 katika mechi iliyochezwa leo Jumatano kwenye Uwanja wa Jamhuri, Dodoma.
Ushindi huo unaifanya Yanga kufikisha pointi 36 katika mechi 14 na hivyo kuwa nyuma ya mahasimu wao Simba wanaoshika usukani wa ligi hiyo wakiwa na pointi 37.
Kwa upande wa Dodoma Jiji wao wanabaki katika nafasi ya 12 wakiwa na pointi 16 katika mechi 15 walizocheza hadi sasa.
Yanga walianza kuandika bao lao la kwanza dakika ya 19 kupitia kwa Clement Mzize akiunganisha kwa kichwa kona iliyochongwa na Pacome Zouzoua.
Dodoma Jiji wakionekana wenye dhamira ya kusaka bao la kusawazisha walishangazwa dakika 10 baadaye, Yanga walipoandika bao la pili lililofungwa na Stephane Aziz Ki.
Aziz Ki alifunga bao hilo baada ya kipa wa Dodoma Jiji, Mohamed Hussein kumchezea rafu Prince Dube na mwamuzi Ahmed Arajiga akaamuru upigwe mpira wa adhabu na Aziz Ki hakufanya makosa.
Mambo yalizidi kuwaharibikia wenyeji Dodoma Jiji dakika ya 37 baada ya Mzize kuandika bao la tatu akiitumia pasi ya Mudathir Yahya ambaye naye alineemeka na makosa ya kipa wa Dodoma Jiji kuokoa vibaya mpira ambao ulimkuta Mudathir.
Karamu ya mabao ya Yanga ilihitimishwa dakika ya 62 kwa bao la Prince Dube aliyemalizia kazi nzuri ya Mudathir.
Dodoma Jiji waliichachafya Yanga katika dakika ya 17 kwa shuti la Daud Milando ambalo lilitoka nje na hivyo kutomsumbua kipa Aboutwalib Msheli na dakika ya 74 Mwana Kibuda alishindwa kuipatia timu yake bao akiwa katika nafasi nzuri ya kufunga.
Katika mechi nyingine ya ligi hiyo iliyochezwa leo, Namungo ikiwa ugenini Manyara ilitoka uwanjani na ushindi wa mabao 2-1 dhidi ya Fountain Gate.
Mabao ya Namungo yaliyofungwa na Paul Busitwa akiitumia pasi ya Hassan Kibailo wakati bao la pili lilifungwa na Geofrey Luzendaze aliyeitumia pasi ya Musa Najim.
Bao pekee la Fountain Gate lilifungwa na Salum Kihimbwa aliyeitumia pasi ya Never Tigere.