Manchester, England
Kocha wa Man United, Ruben Amorim amesema timu yake ipo katika kipindi kigumu baada ya kuchapwa mabao 3-0 na Bournemouth jana Jumapili ikiwa nyumbani Old Trafford.
Man United sasa inakuwa imepoteza mechi mbili mfululizo baada ya kulala kwa mabao 4-3 mbele ya Tottenham Hotspur Alhamisi iliyopita katika Kombe la Carabao.
Kipigo dhidi ya Bournemouth pia kinakuwa kipigo chao cha pili mfululizo kwenye dimba la Old Trafford baada ya hapo kabla kulala kwa mabao 3-2 mbele ya Nottingham Forest.
Amorim alifafanua kwamba wapo katika kipindi kigumu lakini ni lazima kukabiliana nacho na kujiandaa kwa ajili ya mechi inayofuata.
“Ni jukumu langu kuiandaa timu, kweli tunahitaji kuwa bora, kwa sasa kila kitu kigumu kwetu, kwa klabu ya Manchester United kufungwa mabao 3-0 nyumbani ni jambo gumu kwa kila mtu, ukweli ni kwamba hata mashabiki inawaumiza na kuwachosha,” alisema Amorim.
Baada ya kipigo kwenye mechi yao dhidi ya Spurs, Amorim alionekana mwenye kuwalaumu wachezaji wake kwa namna walivyokuwa na mipango mibaya ya kuutawala mchezo baada ya kufungwa mabao mawili katika dakika nane za mwanzo za kipindi cha pili.
Hali ilikuwa inayofanana na hiyo katika mechi yao na Bournemouth ambao waliwafunga Man United mabao mawili katika dakika tatu za mwanzo za kipindi cha pili.
