Madrid, Hispania
Mabao matatu (hat trick) ya Vinicius Jr dhidi ya Borussia Dortmund yamewapagawisha mashabiki wa Real Madrid na sasa ni kama wanataka nyota huyo atangazwe mshindi tuzo ya Ballon d’Or.
Vinicius au Vini alifunga mabao hayo na kuiwezesha Real Madrid kutoka na ushindi wa mabao 5-2 baada ya kuwa nyuma kwa mabao 2-0 katika mechi ya Ligi ya Mabingwa Ulaya iliyopigwa Jumanne usiku.
Mafanikio ya mechi hiyo yalitosha kuwaibua mashabiki waliojazana kwenye dimba la Santiago Bernabeu ambao walianza kuimba, ‘Vinicius, Ballon D’or, Vinicius Ballon D’or.
Ikiwa nyuma kwa 2-0 hadi mapumziko kwa mabao ya Donyell Malen na Jamie Gittens, Real Madrid ilisawazisha kupitia Antonio Rudiger na VinÃcius na Lucas Vazquez akaongeza la tatu na Vinicius tena akamalizia kwa mabao mengine mawili.
Baada ya mechi, Vinicius aliamua kuwajibu mashabiki hao kwa namna tofauti bila kuitaja ‘Ballon D’or badala yake alisema anachotaka ni kuendelea kuwa na klabu hiyo maisha yake yote ya soka.
“Nina miaka 24 na nataka kubaki Madrid kwa maisha yangu yote, nataka kujitolea kwa kila kitu katika klabu hii ambayo imenipa mambo mengi,” alisema Vinicius.
Naye kocha wa Real Madrid, Carlo Ancelotti alimpamba Vinicius akisema ni mchezaji mwenye sifa za kipekee na atashinda tuzo ya Ballon d’Or. kutokana na kiwango chake cha msimu uliopita.
Vinicius, amekuwa akitajwa mara kwa mara kuwa na sifa za kushinda tuzo hiyo kubwa na maarufu duniani ambayo mshindi wake atatangazwa Oktoba 28 mwaka huu.
Kwa hat trick aliyofunga, Vinicius anakuwa mchezaji wa tatu wa Brazil katika Real Madrid kufunga idadi hiyo ya mabao kwenye Ligi ya Mabingwa Ulaya akitanguliwa na Ronaldo de Lima aliyefanya hivyo mwaka 2003 na Rodrygo mwaka 2019.
English