Azam kuweka kambi Zanzibar

Na mwandishi wetu
Vinara wa Ligi Kuu Bara, Azam FC wanatarajia Kuweka kambi ya wiki mbili visiwani Zanzibar kujiandaa na mechi za Ligi Kuu NBC na Kombe la Shirikisho la Azam (ASFC).
Ofisa Habari wa timu hiyo, Thabiti Zacharia alisema leo Jumatano kuwa kambi hiyo itakuwa maalumu kwa ajili ya kulisaidia benchi lao la ufundi kujenga muunganiko mzuri kwa wachezaji wao ambao wametawanyika baada ya mapumziko mafupi waliyopewa tangu walipotolewa kwenye Kombe la Mapinduzi, Zanzibar.
“Tutaingia kambini Januari 23 tukianzia Azam Complex kwa siku mbili kisha tutakwenda Zanzibar kumalizia maandalizi hayo na baada ya hapo tutakuwa tayari kwa mechi za ligi kuu na mashindano mengine,” alisema Thabiti.
Ofisa huyo wa kitengo cha habari, alisema wameichagua Zanzibar kwa sababu ni sehemu tulivu na rafiki kupata miundombinu ikiwemo viwanja vizuri vitakavyoliwezesha benchi lao la ufundi kupanga mikakati yao kwa ubora.
Azam msimu huu imepania kubeba ubingwa wa Ligi Kuu NBC na Kombe la ASFC, na hiyo ni kutokana na maboresho makubwa iliyoyafanya tangu mwanzoni mwa msimu huu.